Երեկ Մոլդովայի խորհրդարանի նախագահ ընտրվեց երկրի գործող նախագահ եւ Կոմունիստական կուսակցության առաջնորդ Վլադիմիր Վորոնինը: Նրա օգտին է քվեարկել 60 պատգամավոր՝ չնայած բավարար էր 52-ը: Խորհրդարանի խոսնակ դառնալով՝ Վորոնինը եւս մի քանի շաբաթ աշխատելու է նաեւ նախագահի պաշտոնում: Նոր նախագահի ընտրությունները տեղի են ունենալու մինչեւ հունիսի 7-ը: BBC-ն հիշեցնում է, որ Մոլդովայում նախագահին ընտրում է խորհրդարանը: Ապրիլին տեղի ունեցած խորհրդարանական ընտրությունների արդյունքում կոմունիստները ստացան 101 ձայներից 60-ը, ինչը թույլ է տալիս նրանց ընտրել խորհրդարանի ղեկավարությունը եւ ձեւավորել կառավարություն: Սակայն երկրի նախագահ ընտրելու համար անհրաժեշտ է 61 ձայն, եւ կոմունիստները ստիպված կլինեն պայմանավորվել ընդդիմության հետ: Մոլդովայի ընդդիմությունը համաձայն չէ խորհրդարանական ընտրությունների արդյունքների հետ եւ չի մասնակցել խորհրդարանի խոսնակի ընտրությանը:
