![\"\"](\"https://www.aravot.am/2009/aravot_arm/May/12/p4.jpg\")
Ֆուտբոլի Հայաստանի գավաթի եզրափակիչ հանդիպումն ավանդաբար կազմակերպվում է մայիսի 9-ին՝ Հաղթանակի օրը:
Հայկական ֆուտբոլում իր նշանակությամբ երկրորդ տիտղոսի համար այս անգամ պայքարեցին Երեւանը ներկայացնող մեր երկու ճանաչված ակումբները՝ «Փյունիկն» ու «Բանանցը»: Խաղը, որ կրկին, ավանդույթի համաձայն, կայացավ Վազգեն Սարգսյանի անվան հանրապետական ստադիոնում, մեծ հետաքրքրություն էր առաջացրել ֆուտբոլասերների շրջանում: Այդ պատճառով էլ տրիբունաներում մի քանի հազար մարզասերներ էին հետեւում դրա ընթացքին: Հետաքրքրասիրության պատճառներից մեկն էլ, անշուշտ, այն էր, որ ՀՖՖ-ի հրավերով հանդիպումը սպասարկելու նպատակով Հայաստան էր ժամանել Իտալիայի մրցավարների բրիգադը՝ ՖԻՖԱ-ի մրցավար Պաոլո Դոնդարինիի գլխավորությամբ: Որ խաղն անցնելու էր անզիջում պայքարում՝ կասկած չկար: Բայց որ ֆուտբոլիստների գլխավերեւում կհայտնվի վեց դեղին եւ երկու կարմիր քարտ՝ ոչ ոք չէր սպասում: Գլխավոր մրցավարը նախ երկրորդ դեղին քարտն ստանալու պատճառով 64-րդ րոպեին խաղադաշտից հեռացրեց «Փյունիկի» խաղացող Էդգար Մալաքյանին, ապա 81-րդին նույն ճակատագրին արժանացրեց «Բանանցի» կիսապաշտպան Նոա Կասուլեին:
Հանդիպման հիմնական ժամանակի 90 րոպեներին կողմերը կարողացան անառիկ պահել սեփական դարպասը: Ամեն բան տանում էր լրացուցիչ ժամանակին: Սակայն մրցավարի ավելացրած լրացուցիչ ժամանակի հենց առաջին րոպեին փյունիկցի Հենրիխ Մխիթարյանը հասավ հաջողության եւ այդ միակ գոլով հաղթանակ պարգեւեց իր թիմին:
Հանրապետության բազմակի չեմպիոն Երեւանի «Փյունիկը» իր կենսագրության մեջ չորրորդ անգամ նվաճեց Հայաստանի գավաթը:
