Պարզվում է, հայկական շոու-բիզնեսը որոշ ընդհանրություններ ունի ադրբեջանականի հետ: Հայաստանում էլ են սեւեռվում այն երեւույթի վրա, որ հայ երգչուհիներից շատերը երեխա են ունենում՝ առանց ամուսնանալու, Ադրբեջանում էլ: Մեզ մոտ էլ չեն հրապարակում երեխայի հոր անունը, այնտեղ էլ: Եվ պարտադիր էլ չէ, որովհետեւ դա որեւէ մեկի գործը չէ:
Ադրբեջանցի KBH-ական, պրոդյուսեր Վադո Կորովինը, day.az-ին տված հարցազրույցում, ժպտալով պատմել է, որ իրենց շոու-բիզնեսի ներկայացուցիչներից մեկի՝ Ռակսաննայի պահվածքն իր մոտ ուղղակի շոկ է առաջացրել. երբ հեռուստահաղորդավարը հետաքրքրվել է՝ ումի՞ց է հղի, Ռակսաննան հանգիստ հայտարարել է՝ ծանոթիցս: Լրագրողի խնդրանքին՝ բնորոշել ադրբեջանական շոու-բիզնեսը, Կորովինն ասել է, որ իրենց երկրում շոու-բիզնես որպես այդպիսին չկա, ու այդ հասկացությունն էլ ավելորդ է պարզ պատճառով՝ իրենց արտիստները հյուրախաղերով չեն մեկնում արտերկիր, որովհետեւ այնտեղ նրանց չեն էլ սպասում: Ի տարբերություն շոու-բիզնեսի ադրբեջանցի ներկայացուցիչների, մերոնց «դրսում» գոնե սպասում են, բնականաբար՝ սփյուռքահայերը:
Ճանաչված KBH-ական պրոդյուսերը նաեւ նշել է, որ ադրբեջանցի կոչումավոր շատ երգիչ-երգչուհիներից՝ որոշ գավառցի արտիստներ ավելի մեծ հեղինակություն ու համարում ունեն, չնայած «մայրաքաղաքայիններն» իրենք իրենց մեգաաստղ ու նման այլ «անուններ» են կպցրել: Փաստենք, որ սա ծանոթ պատկեր է նաեւ Հայաստանում:
