Նամուսով աղջիկների գեղեցկության մրցույթ

Սաուդյան Արաբիայում մեկնարկել է գեղեցկության մրցույթ՝ շարիաթի օրենքներով: Ըստ Newsru.com-ի, «Միսս բարոյականություն» մրցույթի դատավորներին չի հետաքրքրում աղջիկների կազմվածքը կամ դեմքի գեղեցկությունը, նրանք իսկական մուսուլմանուհի են ընտրում: Հոգեւոր գեղեցկության թագուհին կդառնա այն մասնակիցը, որը անկեղծ աստվածապաշտություն եւ ծնողների նկատմամբ նվիրվածություն է ցուցաբերել: «Սա այլընտրանք է գեղեցկությունն այլասերող մրցույթներին, երբ դիտարկվում է միայն կնոջ դեմքն ու արտաքինը,- ասում է մրցույթի հիմնադիր Խադրի Ալնուբարակը:- Հաղթողն անպայման չէ, որ լինի գեղեցկատես, մենք մտածում ենք հոգեւոր գեղեցկության եւ կնոջ բարոյական որակների մասին»:

Վաղը մեկնարկող մրցույթին կմասնակցեն 15-20 տարեկան 200 աղջիկներ: Նրանք անց են կացնելու 10 շաբաթ եւ ուսումնասիրելու են հետեւյալ առարկաները՝ «Ինչպես արթնացնել սեփական ներքին ուժը», «Ինչպես դառնալ առաջնորդ» եւ «Մայրիկ, դրախտը քո ոտքերի տակ է»: Մուհամեդ մարգարեի ցուցումների համաձայն՝ ծնողների նկատմամբ հարգանքն ամենակարեւոր առաքինություններից մեկն է: Դրանից հետո աղջիկները կանցնեն համապատասխան ստուգումներ:

Մասնակիցների մրցույթը չի ցուցադրվելու հեռուստատեսությամբ, իսկ ժյուրիի կազմում չի լինելու ոչ մի տղամարդ: «Միսս բարոյականություն» մրցույթի հաղթողը հայտնի կդառնա հուլիսին եւ կստանա $2600: