![\"\"](\"https://www.aravot.am/2009/aravot_arm/May/7/p7.jpg\")
Կալիֆոռնիայի նահանգապետ Առնոլդ Շվարցենեգերը պատրաստ է հրապարակային բանավեճեր անցկացնել նահանգում՝ մարիխուանայի օրինականացման վերաբերյալ: Ըստ newsru.com-ի՝ այդ քայլի կողմնակիցների կարծիքով, տվյալ թմրանյութի վաճառքից առաջացած հարկերը կօգնեն Կալիֆոռնիային՝ ստանալ եկամտի հավելյալ աղբյուր եւ շտկել տնտեսական ճգնաժամի հետեւանքով ստեղծված ծանր իրավիճակը: Մարիխուանայի վերաբերյալ հարցը նահանգապետին տվել են բնակիչները՝ նրանց հետ հանդիպումներից մեկի ժամանակ: «Չեմ կարծում, որ եկել է դրա ժամանակը, բայց կարծում եմ, որ կարելի է այդ հարցը քննարկել,- պատասխանել է Շվարցենեգերը,- հավանաբար, պետք է մանրակրկիտ ուսումնասիրել այն երկրների փորձը, որտեղ օրինականացված է մարիխուանան եւ մնացած թմրադեղերը ու տեսնել, արդյոք, գո՞հ են նրանք այդ վիճակից»: ԱՄՆ-ում մարիխուանայի արգելքը գործում է 1937 թվականից, սակայն Կալիֆոռնիայի բնակչությունն այդ առումով բավականին ազատակամ մոտեցում ունի: Նահանգում թույլատրվում է որոշ թմրադեղերի օգտագործումը որպես դեղամիջոց: Շվարցենեգերի խոսքերով, փողը միակ բանը չէ, որը պետք է հաշվի առնել թեթեւ թմրադեղերի օրինականացման խնդիրը քննարկելիս:
