Մինչ Հայաստանում կմշակվեն ոստիկանների վարքագծի կանոնները, Չինաստանում նոր սկանդալ է հասունացել: Ըստ newsru.com-ի, ծանոթանալով օրենքի պահապանների համար հատուկ թողարկված ուսումնական ձեռնարկի բովանդակությանը, մի չին ոստիկան որոշել է դրանից հատվածներ հրապարակել ինտերնետում: Նոր «դասագրքի» դաժան ցուցումներից սարսափել են նույնիսկ իրավապահ մարմինների աշխատակիցները: Ուժի կիրառման այդ գրքույկում ոստիկաններին հրահանգվում է չխուսափել համաքաղաքացիներին մարմնական վնասվածքներ հասցնելուց, ընդ որում՝ այն իրականացնելով առանց վկաների: Մանրամասն նկարագրվում է, թե ինչպես պետք է ծեծել մարդկանց՝ առանց հետքերի, վերքերի ու արյան: «Օբյեկտի հետ շփման ժամանակ աշխատեք դեմքի եւ մարմնի վրա արյան հետքեր եւ կապտուկներ չթողնել, նախապես համոզվեք, որ մոտակայքում ոչ ոք չկա», ասվում է «դասագրքում»:
Այս ձեռնարկը նախատեսված է տեղական ինքնակառավարման մարմինների ենթակայության տակ գործող իրավապահների համար: Նրանց հիմնական գործն է պայքարել մանր հանցագործությունների եւ անկարգությունների դեմ: Սակայն նույնիսկ այստեղ նրանց հաջողվել է աչքի ընկնել առանձնակի դաժանությամբ: Նրանց պատճառով արդեն սպանվել է մի քանի մարդ: Մասնավորապես, ծեծելով սպանել էին մի մարդու, որը փորձում էր բջջային հեռախոսով նկարահանել բողոքի դուրս եկած գյուղաբնակների եւ իշխանությունների բախումը: Մեկ այլ դեպքում նրանք մորթել են հրուշակեղեն վաճառողին՝ հենց իր կրպակում:
Մինչ այժմ ենթադրվում էր, որ բոլոր միջադեպերը պայմանավորված են իրավապահ մարմիններում կադրային սխալ քաղաքականությամբ եւ ցածր վարձատրությամբ: Սակայն այժմ պարզ դարձավ, որ ուժայիններին հատուկ «վարժեցնում» են մարդկանց ատելու համար: Հատկանշական է, որ ինտերնետում այս ձեռնարկը հայտնվել է հենց այն ոստիկանի շնորհիվ, որը խոստովանել է, որ շոկ է ապրել այն կարդալիս: Նա վստահ է, այժմ իրավապահները ստիպված կլինեն խմբագրել «դասագիրքը»:
