![\"\"](\"https://www.aravot.am/2009/aravot_arm/May/1/p7.jpg\")
Մեր հենակետային մարզաձեւերի ազգային հավաքականների՝ Եվրոպայի առաջնություններից հետո ՀԱՕԿ-ն ու սպորտի եւ երիտասարդության հարցերի նախարարությունը ֆեդերացիաների, ազգային հավաքականների մարզիչների, առանձին մասնագետների եւ սպորտային բժիշկների մասնակցությամբ ծավալել են դրանց մասնակցության եւ հետագա ծրագրերի քննարկումներ:
Դրանք ղեկավարում է նախարար, ՀԱՕԿ-ի գլխավոր քարտուղար Արմեն Գրիգորյանը:
ՍԻՐՈՂԱԿԱՆ ԲՌՆՑՔԱՄԱՐՏ: Ազգային հավաքականի գլխավոր մարզիչ Ռաֆայել Մեհրաբյանը ներկայացրել է մրցաշրջանի սկզբից կատարվող աշխատանքների ընթացքն ըստ փուլերի, որը նպատակաուղղված է տարվա գլխավոր իրադարձությանը՝ սեպտեմբերի վերջին Միլանում մեկնարկող աշխարհի առաջնությանը: Նրա խոսքերով, ընդհանուր առմամբ նախատեսված է 9 հավաք: Մարզչական խորհուրդը, գնահատելով մարզիկների ունակությունները, տարբեր բռնցքամարտիկների է գործուղում տարվա ընթացքում նախատեսված միջազգային մրցումներ: Նպատակն այն է, որպեսզի հավաքականի բոլոր թեկնածուները տարբեր աշխարհամասերի, ազգային դպրոցների ներկայացուցիչների հետ շփվելու, իրենց կարողություններն ստուգելու եւ մրցափորձը հարստացնելու հնարավորություն ունենան: Ռաֆայել Մեհրաբյանը կարծիք է հայտնել, որ, ամենայն հավանականությամբ, աշխարհի առաջնությանը Հայաստանը կմասնակցի ութ քաշային կարգերում, որովհետեւ 51, 81 եւ գերծանր քաշային կարգերում այդ մակարդակի մրցումներին մասնակցող արժանի մարզիկներ առայժմ չկան:
ՁՅՈՒԴՈ: Օրերս Թբիլիսիում անցկացված Եվրոպայի առաջնությունում մեր հավաքականի անդամները մրցանակային տեղերից անմասն մնացին: Ազգային հավաքականի գլխավոր մարզիչ Արթուր Գեւորգյանի մեկնաբանմամբ, տատամիի մեր չորս վարպետները Թբիլիսիում իրենց հաշվարկին հաղթանակ, այնուամենայնիվ, գրանցել են: Եվրոպայի նախկին չեմպիոն Արմեն Նազարյանին խանգարել են հին ու նոր վնասվածքները, իսկ Հովհաննես Դավթյանին պակասել են կամային լիարժեք պատրաստվածության որակները: Մարզիչը վստահեցրել է, որ իրենք վերլուծություններ արդեն կատարել են, քաղել անհրաժեշտ դասեր, որոնց արդյունքում թերություններն աստիճանաբար կշտկվեն, եւ Հայաստանի թիմն ավելի հաջող հանդես կգա օգոստոսին Ռոտերդամում կայանալիք աշխարհի առաջնությունում:
Մարզաձեւի ներկայի եւ ապագայի իր մտահոգություններն է հայտնել Արմեն Նազարյանի անձնական մարզիչ Կարեն Աբաղյանը: Նա հանրապետության սպորտի ղեկավարությանն իրազեկել է, որ Կոտայքի մարզում, մասնավորապես՝ Հրազդանում, որտեղ աշխատում է, կան բնությունից օժտված բազմաթիվ տղաներ: Նրանք կարող են անվանիներին արժանի փոխարինող դառնալ, եթե բարելավվեն մարզումային պայմանները: Իսկ այդ հարցում շահագրգիռ պետք է լինեն առաջին հերթին մարզի եւ Աբովյան քաղաքի ղեկավարները:
ԱԶԱՏ ԸՄԲՇԱՄԱՐՏ: Հայաստանը, հինգ տարվա ընդմիջումից հետո, Վիլնյուսում առաջին անգամ մեդալներ նվաճեց Եվրոպայի առաջնությունում: Պատվո պատվանդանի երրորդ աստիճանին բարձրացան Ժիրայր Հովհաննիսյանն ու Էդգար Ենոքյանը: Իսկ գերծանր քաշային կարգում Ռուսլան Բասիեւը դարձավ արծաթե մեդալակիր: Իսկ հավաքականի նրանց ընկերները իրենց քաշային կարգերում տեղ զբաղեցրին առաջին ութնյակում՝ Հայաստանի համար թիմային պայքարում ապահովելով պատվավոր 5-րդ տեղը:
Քննարկման ընթացքում հատուկ նշվեց, որ այդ հաջողության մեջ մեծ է եղել մարզական կազմակերպությունների՝ ֆեդերացիա-օլիմպիական կոմիտե-նախարարություն, համագործակցված աշխատանքը: Շնորհակալ աշխատանք են կատարել ազգային հավաքականի նորանշանակ գլխավոր մարզիչ Արայիկ Բաղդադյանը եւ նրա օգնականները: Ներկայացնելով ազատ ոճայիններ ազգային հավաքականի հետագա անելիքների ծրագիրը՝ Արայիկ Բաղդադյանն ընդգծել է, որ իր ղեկավարած թիմը, շնորհիվ ֆեդերացիայի նախագահ Սամվել Կարապետյանի եւ ֆեդերացիայի նոր ղեկավար կազմի, ապահովված է մարզումային եւ մնացած բոլոր պայմաններով:
Երեկ քննարկումները շարունակվում էին:
