Սթիվեն Քոլի կողմից հրապարակված՝ «Ալ-Ղայիդա» միջազգային ահաբեկչական ցանցի առաջնորդ Ուսամա բեն Լադենի եւ նրա տոհմի կենսագրությունն այս տարի դարձավ լրագրողական ոլորտում ամենամեծ համբավ ունեցող Պուլիցերյան մրցանակի եզրափակչի մասնակից: Այդ մասին, ինչպես հաղորդում է «Ռիա Նովոստին», Կոլումբիայի համալսարանում դափնեկիրների անվանակոչման ժամանակ հայտնեցին մրցանակի ժյուրիի անդամները: Քոլի «Բեն-Լադենները. արաբական ընտանիքը ամերիկյան դարաշրջանում» գրքում արծարծվում է այդ տոհմի պատմությունը՝ մինչեւ 2001 թվականի սեպտեմբերի 11-ի ողբերգությունն ընկած ժամանակները: Ժյուրին նշել է այդ գրքի ուսումնասիրության խորությունը եւ թեմայի արդիականությունը: Ըստ ավանդույթի, գաղտնի քվեարկության են դրվում եզրափակիչ անցած երեք թեկնածուների անուններ: Հաղթում է առավելագույն ձայներ հավաքած թեկնածուն: Բեն Լադենի կենսագրությունը մրցում էր ԱՄՆ երկու նախագահների՝ Էնդրյու Ջեքսոնի եւ Ֆրանկլին Դելանո Ռուզվելտի պատմությունների հետ: Մրցույթի դափնեկիր ճանաչվեց Ջոն Միչեմի «Ամերիկյան առյուծ Էնդրյու Ջեքսոնը Սպիտակ տանը» գիրքը:
Պուլիցերյան մրցանակի պատմությունը սկսվում է 1917 թ., երբ ամերիկյան լրագրող Հերբերթ Բայարդ Սվոփը ստացավ առաջին մրցանակը «Գերմանական կայսրությունը՝ ներսից» նյութերի շարքի համար, որը հրատարակվեց «New-York world»-ում, 1916 թվականի հոկտեմբերին: Ըստ aysor.am-ի, մրցանակի չափը կազմում է 10 հազար դոլար, իսկ «Հանրությանը ծառայության համար» անվանակարգում հաղթողին տրվում է նաեւ ոսկե շքանշան:
