![\"\"](\"https://www.aravot.am/2009/aravot_arm/April/23/p23.jpg\")
Երեկվա դրությամբ Գյումրիում փակվել է թերթի վաճառքով զբաղվող 5 կրպակ: Կրպակավարները կամավոր կամ հարկադրաբար աշխատանքից ազատման դիմում են գրել: Այս մասին տեղեկացնում է «7 օր»-ը: Աղբյուրի փոխանցմամբ, կրպակավար Վերա Հակոբյանին կանչել են մայրաքաղաք եւ ստիպել են աշխատանքից ազատման դիմում գրել: Կրպակավարների շրջանում պտտվող լուրերի համաձայն՝ մի քանի կրպակ էլ կփակվի առաջիկայում: Նրանց հավաստմամբ, առեւտուրը կրճատվել է կրկնակի, եռակի: Թերթեր շատ քիչ են վաճառվում: Ամեն թերթից 1-2 օրինակ են ստանում, այն էլ երբեմն հետ են ուղարկում: «Եթե ամեն թերթից ստանում էինք 5-6 օրինակ, ապա այսօր ամենաշատը 2 օրինակ ենք պատվիրում, վաճառք չկա»,- նշել է կրպակավարներից մեկը: Նրանց խոսքերով, վաճառքը նվազել է հատկապես ապրիլի սկզբից, երբ սկսվեցին համատարած թանկացումները: Մեկ այլ կրպակավարի ներկայացմամբ էլ. «100 դրամն էլ մարդիկ խնայում են: Պատկերացրեք, որ հիմնական վաճառվող թերթերն արժեն 100-150 դրամ, այսինքն՝ հացի փող: Մարդիկ էլ էս նեղ պահին թերթ կարդալու տեղը գերադասում են հաց առնել»:
Եկամուտ ունենալու եւ գոնե հարկերը ժամանակին վճարելու համար, կրպակների աշխատակիցները օրաթերթերի ու ամսագրերի կողքին վաճառում են նաեւ ծխախոտ, քաղցրավենիք, տնտեսական ապրանքներ, սակայն դրանք եւս ելք չեն:
