Չորեքշաբթի օրը ՌԴ նախագահ Դմիտրի Մեդվեդեւը հանդիպել է մի շարք հասարակական կազմակերպությունների ղեկավարների հետ: Բարձրացրած խնդիրներից մեկը վերաբերում էր քաղաքացիների խաղաղ ցույցերի եւ երթերի իրավունքի համատարած խախտումներին: Մեդվեդեւը համաձայնել է, որ նման խնդիր իսկապես գոյություն ունի: «Իշխանությունները, իհարկե, երբեք չեն ուզում թույլատրել նման միջոցառումներ, եւ դա մասամբ կարելի է հասկանալ: Բայց բոլոր դեպքերում նման որոշումները հիմնված չեն օրենքի վրա»,- նշել է ՌԴ նախագահը: Ըստ նրա, շատ բան կախված է իշխանությունների ներքին կուլտուրայից: «Ոմանք բանականություն են ունենում՝ որոշում ընդունելու միջոցառումն ավելի անվտանգ տեղում անցկացնելու վերաբերյալ, ոմանց էլ բանականությունը չի հերիքում, եւ նրանք պարզապես արգելում են»,- նկատել է Ռուսաստանի ղեկավարը: Մեդվեդեւի կարծիքով, հարցը չի կարող լուծվել օրենսդրական բազայի փոփոխությամբ: «Խոսքը ավելի շուտ ներքին մոտիվացիայի՝ վախի մասին է, որն առկա է որոշում ընդունող այս կամ այն մարդկանց մոտ, իսկ վախ չպիտի լինի, պիտի լինի զգուշություն, որպեսզի վտանգի չենթարկվի այն մարդկանց կյանքը, որոնք ուզում են հավաքվել եւ իշխանությանն ինչ-որ բան ասել»,- տեսակետ է հայտնել Մեդվեդեւը: Հանդիպման մասնակիցներից մեկն առաջարկել է Մոսկվայում մի տեղ հատկացնել, որտեղ քաղաքային իշխանությունները թույլ կտան անցկացնել հանրահավաքներ: Այդ տեղը, ըստ հ/կ-ների ներկայացուցիչների, պետք է նման լինի լոնդոնյան «Հայդ պարկին» եւ գտնվի քաղաքի կենտրոնում: Մեդվեդեւը համաձայնել է, որ «Հայդ պարկն» իսկապես շատ լավ է նայվում:
