«Վրաստանում ներքաղաքական իրավիճակը գնալով ավելի է սրվելու»,- երեկ «Ա1+»-ին ասաց «Նոր ժամանակներ» կուսակցության նախագահ Արամ Կարապետյանը: Իսկ իրավիճակը ինչո՞վ կավարտվի, պարոն Կարապետյանը չշտապեց կանխատեսել՝ բացատրելով, որ ամեն ինչ կախված է, թե այս օրերի ընթացքում ինչ կորոշի ԱՄՆ-ն. «Այսօր Մըքքեյն է Վրաստանում, վաղն այնտեղ կայցելի Մեթյու Բրայզան, իսկ Վրաստանի ԱԳ նախարարն էլ ԱՄՆ-ում է, ԱՄՆ-ն մեծ ազդեցություն ունի Վրաստանում: Ինչպիսին կլինի ԱՄՆ կառավարության վերաբերմունքը, դրանից շատ բան կախված կլինի»:
Արամ Կարապետյանը գտնում է, որ ԱՄՆ-ն կաջակցի Վրաստանին, իսկ կոնկրետ Սահակաշվիլուն՝ դժվարացավ ասել. «Երեկ ԱՄՆ-ն 242 միլիոն դոլարի ֆինանսական աջակցություն է հատկացրել Վրաստանին: Դրանից առաջ 186 միլիոն դոլարի օգնություն էր տրամադրել Արժույթի միջազգային հիմնադրամը: ԱՄՆ-ն փորձում է աջակցել Վրաստանին՝ տնտեսական վիճակից դուրս գալու համար: Այս մասին բացահայտ ասել է նաեւ Սահակաշվիլին»:
Որքան էլ ԱՄՆ-ն փորձի աջակցել Վրաստանին, Արամ Կարապետյանի կարծիքով՝ Սահակաշվիլին երկար չի դիմանա եւ կհանձնվի. «Չի դիմանա թե՛ ժողովրդի ճնշմանը, թե՛ արտաքին ճնշումներին եւ կհանձնվի»:
Ինչ վերաբերում է ՀՀ-ում եւ Վրաստանում տիրող իրավիճակների ընդհանրություններին եւ տարբերություններին, ապա պարոն Կարապետյանն ասաց. «Փոփոխությունների ժամանակաշրջան է սկսվում: ԱՊՀ բոլոր երկրների նմանատիպ գործողությունները ազդում են մյուս երկրների վրա: Ամեն ինչ դեռ վերջացած չէ նաեւ Մոլդովայում»: Նաեւ ավելացրեց. «ԱՊՀ բոլոր երկրներում ընդհանուր կյանքի որակն այնքան է վատացել, որ բոլորն էլ կանգնած են հեղափոխության շեմին»:
