![\"\"](\"https://www.aravot.am/2009/aravot_arm/April/15/p10.jpg\")
Ըստ ՀՀ տարածքային կառավարման նախարարության տարածած հաղորդագրության, ՀՀ փոխվարչապետ, տարածքային կառավարման նախարար Արմեն Գեւորգյանը անցած շաբաթավերջին շրջայց է կատարել Արտաշատի ջրանցքի երկայնքով՝ Երեւանով անցնող հատվածից՝ Տիգրան Մեծի պողոտային զուգահեռ մինչեւ Մխչյանի պոմպակայանի ժայթքման կետ, եւ պարզել, որ ողջ ջրանցքը վերածվել է աղբավայրի։ Հարակից տնտեսություններն ու կազմակերպություններն աղբն ու կեղտաջրերն ուղղակի ջրանցքն են լցնում։ Ստեղծված ծայրահեղ հակասանիտարական վիճակում ջրանցքի թողունակությունը՝ նախագծային 16 մ/վրկ-ից, իջել է մինչեւ 7 մ/վրկ-ի։
Արմեն Գեւորգյանը անթույլատրելի է համարում, որ ջրանցքի ամբողջ երկայնքով՝ թե՛ մայրաքաղաքի հատվածում, թե՛ գյուղերի ու ամառանոցների տարածքներում եւ անգամ՝ դաշտավայրերում, տեխնիկական սպասարկման գոտիները զավթված են։ Ջրանցքը շրջապատված է ապօրինի շինություններով ու կառույցներով։ Փոխվարչապետը հանձնարարել է արագացնել ջրանցքի եւ դյուկերի մաքրման աշխատանքները եւ պահանջել է տեղական իշխանությունների հետ համատեղ միջոցներ ձեռնարկել ապօրինի շինությունների խնդիրը լուծելու համար, որպեսզի հնարավոր լինի ջրանցքն արդյունավետ եւ անխափան շահագործել:
