Միացյալ Նահանգները պատրաստ է շարունակել իր նոր ռազմավարությունը միջուկային զենքի վերաբերյալ Իրանի հետ իր բանակցություններում: Ըստ Newsru.com-ի, Բարաք Օբամայի վարչակազմը եվրոպական դաշնակիցների հետ նոր առաջարկություններ է պատրաստում Իրանի խնդրով: Նոր ռազմավարության արմատական ազդեցությունը կլինի այն, որ ԱՄՆ-ն չի պահանջի Իրանից անհապաղ փակել միջուկային օբյեկտները: Ամերիկյան դիվանագետները հայտնել են լրագրողներին, որ, ի վերջո, ցանկացած վարչակազմ Իրանից պահանջելու է ամբողջությամբ վերջ տալ ուրանի հարստացմանը, ինչպես որ դա պահանջում են ՄԱԿ-ի անվտանգության խորհրդի մի քանի բանաձեւերը: Բանակցությունների հիմնական թեմաներից մեկն է լինելու Իրանին ուղղված առաջարկությունը՝ բացել իր միջուկային ծրագիրը լայնամասշտաբ ստուգումների համար: Ռազմավարության փոփոխությունը հիմնականում պայմանավորվում է նրանով, որ Միացյալ Նահանգներում հստակորեն գիտակցում են՝ Իրանը չի համաձայնի վերսկսել բանակցությունները նախկինում առաջարկվող պայմաններով: Ի պատասխան դրա, Իրանի նախագահ Մահմուդ Ահմադինեջադը հայտարարել է, որ Իրանի ժողովուրդը կողջունի այդ առաջընթաց քայլն այն դեպքում, եթե վերջինս պայմանավորված է ազնվությամբ, արդարությամբ եւ հարգանքով:
