«Սթար» ընկերությունը եւ «Արմինֆո» տեղեկատվական գործակալությունը համատեղ՝ սպառողներին են ներկայացնում «Arminfo Star» առաջին անկախ սպառողական ինդեքսը։ Այն ըստ էության հանդիսանում է ճաշի սեղանի ինդեքս (Dining Table Price index- DTPI): «Arminfo Star» նախագծի շնորհիվ փորձ է արվում արտացոլելու միջին խավի ամենամասսայական՝ պարենային ապրանքների ծախսերը։ Այսպես, սպառողական ինդեքսը 2009 թվականի մարտին՝ փետրվարի համեմատությամբ, կազմել է 116,43 դրամ։ Հետեւաբար, պարենային զամբյուղի արժեքը, որի շնորհիվ կարելի է ճաշի սեղան գցել, մարտ ամսին աճել է 16,4%-ով։ Մեկ գնման միջին արժեքը, նույն ժամանակահատվածում, իջել է աննշան՝ 2589-ից հասնելով 2452 դրամի։ 44 տեսակի սննդամթերքից 30-ի գները աճել են, իսկ 14-ի գները՝ նվազել։ Մարտ ամսին ամենաշատը բարձրացել են՝ թեյի (55%), նարինջի (53,7%), բանանի (38,9%) եւ բուսական յուղի (37,2%) գները։ Մնացած 26 տեսակի ապրանքների գները բարձրացել են 1-28%-ով։ Էապես իջել են ալյուրի (82%) եւ խոզի մսի (32,7%) գները, իսկ մնացած 12 տեսակի ապրանքների գները նվազել են 1-6%-ով։
Նշենք, որ «Arminfo Star»-ը այլընտրանք չի հանդիսանում Ազգային վիճակագրական ծառայության սպառողական գների ինդեքսին, քանի որ վերջինս ընդգրկում է ուսումնասիրությունների ավելի լայն շրջանակ: «Arminfo Star»-ի նպատակն է ցույց տալ սուպերմարկետներից գնումներ կատարող բնակչության ամենամսյա ծախսերի շարժը: Տեղեկացնենք նաեւ, որ ինդեքսը հաշվարկվում է «Սթար» սուպերմարկետների ցանցում ամենաշատ վաճառվող ապրանքների գների հիման վրա։ Այսուհետեւ յուրաքանչյուր ամիս, բացի ինդեքսից, «Arminfo Star»-ը սպառողներին տեղեկություններ կտրամադրի նաեւ գների իջեցման ակցիաների վերաբերյալ, այդ ժամանակ գնորդների համար հնարավոր տնտեսման հնարավորությունների հաշվարկների, ինչպես նաեւ գնորդների քանակի վերաբերյալ։
