«Մենք միայն ուսումնական գրքեր ենք ստանում, գեղարվեստական գրականության համալրում չի կատարվում»,- ասում է Երեւանի Լ. Շանթի անվան թիվ 4 դպրոցի տնօրեն Ա. Վարդանյանը։ Նրա խոսքերով, միակ գրականությունը, որ ստանում են, մանր տեխնիկական գրքեր են, երբեմն՝ Երեւան քաղաքի մասին, վերջերս նաեւ` Վազգեն Սարգսյանին նվիրված գրականություն։ Գրադարանը հարուստ է հիմնականում դասագրքերով եւ այն գրականությամբ, որը լույս է տեսել մինչեւ 1990-ական թվականները։ «1990-ից այս կողմ հրատարակված գրականություն չունենք, եթե հրատարակեին, կարծում եմ՝ կստանայինք»,- ասում է տնօրենը։ Դպրոցը տարին մեկ անգամ հաշվետվություն է ներկայացնում Երեւանի քաղաքապետարան, թե քանի կտոր գիրք ունեն, ինչքան են ստացել։ Տնօրենի կարծիքով՝ մեծ ջանք պետք է թափել եղած քիչ քանակությամբ գրականությունը պահպանելու համար։ Դպրոցի գրադարանից հաճախ են օգտվում թե ուսուցիչները, թե աշակերտները։
Կրթության ազգային ինստիտուտի փոխտնօրեն Գագիկ Մելիքյանն ասաց, որ միայն ավագ դպրոցներին է անվճար տրամադրվելու ուսումնական, մասնագիտական եւ գեղարվեստական գրականություն, իսկ մյուս դպրոցներն իրենց սեփական բյուջեից պետք է գումար տրամադրեն նոր գրականություն ձեռք բերելու համար։
Այս ամենից թերեւս կարելի է եզրակացնել, որ եթե նույնիսկ նոր գրականություն լույս տեսնի, այնուամենայնիվ, դպրոցներն անմասն կմնան, քանի որ դպրոցի բյուջեն չի բավականացնի դրանք ձեռք բերելու համար։
