![\"\"](\"https://www.aravot.am/2009/aravot_arm/April/8/p12.jpg\")
Մոլդովայի մայրաքաղաքում շարունակվում են բախումները ընտրությունների արդյունքների դեմ բողոքող ընդդիմության եւ ոստիկանության միջեւ: Հանրահավաքի մասնակիցները փորձել են գրավել նախագահի նստավայրը, սակայն իրավապահները կարողացել են դիմակայել: Դրանից հետո ընդդիմության կողմնակիցներին հաջողվել է ներխուժել խորհրդարանի շենք, որի պատուհաններից սկսեցել են շպրտել համակարգիչներ եւ կահույք: 2 կողմից էլ կան տուժածներ: Ոստիկանության ներկայացուցիչները ընդդիմության գործողությունները բնութագրել են իբրեւ զանգվածային անկարգություններ, սակայն խոստանում են անել ամեն ինչ, որպեսզի զոհեր չլինեն: Հանրահավաքի մասնակիցներն այրում են ընտրություններում հաղթած կոմունիստների կարմիր դրոշները, վանկարկում են հակակոմունիստական կարգախոսներ, զերծ չեն մնում նաեւ ազգայնամոլական հայտարարություններից: «Երեկ մեզնից գողացան ընտրությունները: Մենք դուրս չենք գա հրապարակից մինչեւ չվերականգնվի արդարությունը: ԿԸՀ-ի կողմից հայտարարված արդյունքները չեն արտացոլում իրականությունը»,- երեկ լրագրողներին ասաց «Լիբերալ-ժողովրդավարական» կուսակցության առաջնորդ Վլադ Ֆիլատը: Մոլդովայի գլխավոր դատախազությունը հարուցել է քրեական գործ՝ «զանգվածային անկարգություններ» հոդվածով: Իրավապահները գտնում են, որ ընդդիմությունը թույլ տվեց, որպեսզի ցուցարարները դառնան անվերահսկելի ամբոխ:
