![\"\"](\"https://www.aravot.am/2009/aravot_arm/April/3/p9.jpg\")
Երեւանի նախկին քաղաքապետ Երվանդ Զախարյանի նկարներով ցուցապաստառները ձեռքներին, երեկ մայրաքաղաքի իրացման գոտու հարյուրից ավելի բնակիչներ հավաքվել էին կառավարության շենքի աջեւ: «Բոլորիս կողոպտեց, թալանեց, իսկ մեր իշխանությունները նրան պատասխանատվության ենթարկելու փոխարեն՝ ավելի բարձր պաշտոն են առաջարկում»,- բողոքում էին ցուցարարները: «Սեփականության իրավունքի պաշտպանություն» հ/կ նախագահ Վաչագան Հակոբյանն էլ «Առավոտին» փոխանցեց, որ, իրենց տեղեկություններով, նախկին քաղաքապետին ուզում են Ռուսաստանի Դաշնությունում դեսպան նշանակել, ինչն էլ ավելի է վրդովեցրել իրենց բնակարաններից զրկված բնակիչներին: Նշենք, որ երեկ ցույցին մասնակցում էին մայրաքաղաքի Ամիրյան, Աբովյան, Կողբացու, Տիգրան-Մեծի, Զավարյան եւ Նար-Դոսի փողոցների բնակիչները:
Ըստ Վ. Հակոբյանի, «հիմա իրենք օդում կախված վիճակում են, նորանշանակ քաղաքապետը թեեւ չի մերժել իրենց խնդիրներին լուծում տալ, սակայն դրական էլ չի արձագանքում»: Նրա խոսքերով. «Երեւի սպասում է, որ քաղաքապետի ընտրությունները լինի, գնանք իրեն ընտրենք»: Մեր այն դիտարկմանը, թե իրացման գոտու բնակիչներից շատերը հաշվառման վայր չունենալու պատճառով զրկված են ընտրելու իրավունքից, Վ. Հակոբյանը պատասխանեց. «Ընտրելու իրավունք չունենք, բայց լավ շրջապատ ունենք, որ կարող է նրան սատարել»:
