«Մարտի 1»-ի ԱԺ ժամանակավոր հանձնաժողովի աշխատանքային նիստը երեկ անցկացվեց դռնփակ: Հանձնաժողովին պարզաբանումներ էր տալիս Հատուկ քննչական ծառայության քննիչ Գորիկ Հովակիմյանը:
Հիշեցնենք, որ հանձնաժողովի մարտի 24-ի նիստում մարտի 1-ին «Չերյոմուխա-7»-ի կիրառումից զոհված Տիգրան Խաչատրյանի ծնողները հայտարարել էին, թե հակասություններ են նկատել. ըստ մեղադրական եզրակացության՝ Տիգրան Խաչատրյանը զոհվել է 20.30-ի սահմաններում: Մինչդեռ նրա ծնողներն ապացույց են ներկայացրել՝ բջջային հեռախոսը, որով Տիգրան Խաչատրյանը նկարահանումներ էր կատարել, եւ տեսագրված նյութի վրա արձանագրված է 21:15 րոպեն:
Մարտի 25-ին հանձնաժողովը նաեւ զրույցի էր հրավիրել Տիգրան Խաչատրյանի ընկերոջը՝ Արտյոմ Աբովյանին, որը մարտի 1-ի երեկոյան եղել է Տիգրանի հետ: Սակայն այս զրույցը պակաս արդյունավետ է եղել:
Հանձնաժողովի անդամները երեկ քննիչից փորձել են ստանալ ժամերի վերոհիշյալ տարբերության ու նաեւ այն փաստի բացատրությունը, որ դատաբժշկական փորձաքննությամբ պարզվել է, թե Տիգրան Խաչատրյանը մահից առաջ ստացել է բութ գործիքի հարվածներից վնասվածքներ: Սակայն ըստ հանձնաժողովի անդամների՝ Գորիկ Հովակիմյանն, ըստ էության, որեւէ բացատրություն չի ունեցել այս փաստերից եւ ոչ մեկի վերաբերյալ:
Եվս մի հանգամանք՝ թեեւ կան ականատես ոստիկաններ, որոնք ներկա են եղել, երբ Տիգրան Խաչատրյանի դիակը տեղափոխել են շտապօգնության մեքենա՝ մինչ այժմ չեն հայտնաբերվել այդ վկաները: Եվ նախաքննության մարմինն այդ կապակցությամբ կարծես առանձնակի նախանձախնդրություն էլ չի դրսեւորել: Ուստի ժամանակավոր հանձնաժողովը երեկ որոշել է դիմել ոստիկանությանը՝ ծառայողական քննություն իրականացնելու խնդրանքով, որ պարզեն այդ ոստիկանների ինքնությունը:
Առաջիկայում ժամանակավոր հանձնաժողովի աշխատանքային նիստին է հերթական անգամ հրավիրվելու «Մարտի 1»-ի գործով քննչական խմբի ղեկավար Վահագն Հարությունյանը, որից նույնպես փորձելու են ստանալ պարզաբանումներ այս հակասությունների վերաբերյալ:
