![\"\"](\"https://www.aravot.am/2009/aravot_arm/March/28/p15.jpg\")
Ավելի քան 200 տարի Մեծ Բրիտանիայում գործող թագաժառանգության մասին օրենքը կարող է փոփոխության ենթարկվել: Բրիտանացի խորհրդականները գտնում են, որ այդ օրենքը խտրականության տարրեր է պարունակում: 1701 թվականին ընդունված թագաժառանգության մասին ակտի գլխավոր նպատակն էր թույլ չտալ Ստյուարտների կաթոլիկ դինաստիային մոտենալ Անգլիայի գահին: Ըստ այդմ, թագավոր կարող էր դառնալ միայն անգլիկան եկեղեցու անդամը: Այդ օրենքի համաձայն, թագաժառանգության իրավունքից զրկվում էին կաթոլիկները, ինչպես նաեւ՝ կաթոլիկների հետ ամուսնացած անձինք եւ նրանց հետնորդները: Բացի այդ, տղամարդ թագաժառանգներին գերապատվություն էր տրվում կանանց նկատմամբ: Այդ օրենքը, գրում է «Գազետա» թերթը, գործում է առ այսօր, եւ Բրիտանիայի խորհրդարանը վաղուց արդեն պատրաստվում է այն վերանայել: Մասնավորապես, վերանալու է խտրական վերաբերմունքը կանանց եւ կաթոլիկների նկատմամբ, սակայն ինքը՝ թագավորը, ըստ փոփոխված օրինագծի, այնուամենայնիվ, պետք է բողոքական լինի: Ըստ պատգամավորներից մեկի՝ անհեթեթ է այն իրավիճակը, երբ թագաժառանգը կարող է ամուսնանալ մահմեդականի կամ աթեիստի հետ, իսկ կաթոլիկի հետ իրավունք չունի ընտանիք կազմել:
