![\"\"](\"https://www.aravot.am/2009/aravot_arm/March/28/p17.jpg\")
ԱՄՆ նախագահ Բարաք Օբամայի մաշկի գույնը հանգիստ չի տալիս էքսցենտրիկ բնավորությամբ հայտնի Իտալիայի վարչապետ Սիլվիո Բեռլուսկոնիին: Երբ լրագրողներից մեկը նրան ասաց, որ համաշխարհային ճգնաժամի վերաբերյալ իր տեսակետներով նա շատ բանով նման է Օբամային, Բեռլուսկոնին, որը կլոր տարին ընդունում է արեւային լոգանքներ, դրան պատասխանեց. «Ես ավելի սպիտակամաշկ եմ եւ դա այն պատճառով, որ վաղուց արեւի տակ չեմ պառկել, գումարած դրան՝ Օբաման ավելի համակրելի է, երիտասարդ եւ բոյով»: Newsru.com-ը հիշեցնում է, որ Բեռլուսկոնիի նախորդ կատակը Օբամայի մաշկի վերաբերյալ՝ քաղաքական շատ գործիչներ համարել են ոչ միայն անհամ, այլեւ՝ ռասիստական: Անցած տարվա նոյեմբերին Ռուսաստանի նախագահ Մեդվեդեւի ներկայությամբ 72-ամյա Բեռլուսկոնին ասաց, որ Օբամայի ընտրությունները հասարակական կարծիքի կողմից ընկալվել են որպես մեսիայի գալուստ: Իտալիայի վարչապետն այն ժամանակ հույս հայտնեց, որ Մեդվեդեւը լավ հարաբերություններ կհաստատի Օբամայի հետ, քանի որ վերջինս նույնքան գեղեցիկ է, երիտասարդ եւ արեւահարված: Բեռլուսկոնին չի պատրաստվում ներողություն խնդրել այդ կատակի համար, քանի որ իր խոսքերն էլ համարում է հաճոյախոսություն, իսկ նրանց, ովքեր կատակներ չեն հասկանում, անվանել է հիմարներ: Այդ կատակը զայրացրել էր նույնիսկ Ֆրանսիայի առաջին տիկին Կառլա Բրունիին, որն ասել է, թե, Բեռլուսկոնիի «կատակների» պատճառով ինքը երբեմն շատ է ուրախանում, որ այլեւս իտալուհի չէ:
