![\"\"](\"https://www.aravot.am/2009/aravot_arm/March/27/p6.jpg\")
Հայաստանի բռնցքամարտի ֆեդերացիայից տեղեկացնում են, որ երեկվա դրությամբ մայիսի վերջին Կարեն Դեմիրճյանի անվան մարզահամերգային համալիրում կայանալիք բռնցքամարտի աշխարհի պատանեկան առաջնությանը մասնակցելու հայտ ներկայացրել է արդեն շուրջ 28 երկիր: Սպասվում է, որ հայտերի թիվը զգալիորեն կավելանա, քանի որ դրանց ներկայացման վերջնաժամկետը ապրիլի 23-ն է:
Ֆեդերացիայից տեղեկացնում են նաեւ, որ մարզաձեւի միջազգային ասոցիացիան հաստատել է մեր ֆեդերացիայի ներկայացրած՝ աշխարհի առաջնության պաշտոնական տարբերանշանը:
Հայաստանի պատանեկան հավաքականը հարազատ հարկի տակ առաջին անգամ անցկացվող աշխարհի առաջնությունում պատշաճ մակարդակով հանդես գալու նպատակով՝ մոտ օրերս պատրաստվում է մեկնել Մոսկվա եւ Մոսկվայի մարզի հավաքականի հետ համատեղ ուսումնամարզական հավաք անցկացնել: Մեր հավաքականը չորս քաշային կարգերի հրավեր ունի նաեւ Հունաստանի բռնցքամարտի ֆեդերացիայից: Մոսկովյան հավաքից հետո ավագ մարզիչ Ֆեդյա Ալեքսանյանը կորոշի, թե ովքե՞ր կմեկնեն Պատրա քաղաք՝ մասնակցելու այդ տարիքային խմբի միջազգային մրցաշարին:
