![\"\"](\"https://www.aravot.am/2009/aravot_arm/March/25/p18.jpg\")
Երեկ Երեւան-Կրասնոդար՝ ժամը 13.30-ի չվերթի ուղեւորները օդանավակայանում 6 ժամ սպասել են թռիչքին: Ընդ որում, «Կուբանյան ավիաուղիներից» անգամ նեղություն չեն կրել ուղեւորներին նախապես զգուշացնել, որ շուրջ 6 ժամ թռիչքը հետաձգվելու է: Մինչ Երեւան-Կրասնոդար թռիչքը, ընկերության աշխատակիցները վստահեցրել են, որ այն նշված ժամին կկայանա: 6 ժամ սպասելուց հետո, ուղեւորները ընկերության աշխատակիցներից պահանջել են իրենց գոնե սնունդով ապահովել, հաղորդակցության միջոցներ տրամադրել, ինչպես որ օրենքն է պահանջում: Սակայն ավիաընկերության ներկայացուցիչներ Վահե Հայրապետյանը եւ Արթուր Պետրոսյանը, ուղեւորներից ներողություն խնդրելու եւ ուշացման պատճառները հայտնելու փոխարեն, աղմուկ են բարձրացրել եւ ասել. «Ըտենց օրենք գոյություն չունի»:
Ի գիտություն «Կուբանյան ավիաուղիների» աշխատակիցների, նշենք, որ «Ավիացիայի մասին» Հայաստանի Հանրապետության օրենքի 63-րդ հոդվածի 4-րդ կետն ասում է.
Փոխադրողը պարտավոր է իր կողմից իրականացվող չվերթի՝ ուղեւորի փոխադրման տոմսով նախատեսված ժամից ուշացման դեպքում հոգալ ուղեւորների կարիքները, սկսած՝
1) 2 ժամից՝ սնունդով.
2) 4 ժամից՝ հաղորդակցության միջոցներով եւ հնարավորություններով.
3) 8 ժամից՝ կացարանով:
