100-ամյա գրադարանի օգնությամբ 47 հոգի գիտական աստիճան է ստացել
![\"\"](\"https://www.aravot.am/2009/aravot_arm/March/24/p16.jpg\")
![\"\"](\"https://www.aravot.am/2009/aravot_arm/March/24/p15.jpg\")
Հայկուշ Շաքարյանն է 100-ամյա գրադարանի այսօրվա «տիրուհին»,
իսկ սրանք գրադարանի առաջին գրքերն են:
Այս տարի լրանում է Ալավերդու «Արմենիան Քափըր Փրոգրամ» ընկերությանը պատկանող գիտատեխնիկական գրադարանի ստեղծման 100-ամյակը: 1909 թվականի մարտին Ալավերդու պղնձաձուլական գործարան փորձաշրջանի ժամանած մի խումբ ուսանողների նախաձեռնությամբ ստեղծված մասնագիտական փոքրիկ գրադարանը սկզբում տեղավորվել է գործարանի գլխավոր ինժեների առանձնասենյակի պահարանում: «Գրքերը հիմնականում ֆրանսերեն եւ անգլերեն էին, որոնք անհասկանալի ու անմատչելի էին տեղացիների համար, գրագետ մարդիկ էլ քիչ էին»,- այսպիսի հիշողություն է թողել նորաստեղծ գրադարանի մասին անվանի մետալուրգ, ինժեներ Վախթանգ Զարապովը: 100-ամյա գրադարանի առաջին գրքերն այսօր առանձին գրապահոցում են պահվում:
Գրադարանը մեծացել, սեփական տարածք է ստացել խորհրդային տարիներին: Այժմ գրական ֆոնդը 110 հազար գիրք է, գումարած գիտատեխնիկական հաշվետվություններ, թարգմանություններ, մասնագիտական եւ տեխնիկական ամսագրեր, պարբերական մամուլ: 100-ամյա կյանքի ճանապարհին բացառիկ է եղել գիտատեխնիկական գրադարանի դերը որակյալ մետալուրգներ պատրաստելու գործում:
«Գրադարանը իմ լավ բարեկամն ու ընկերն է, որն ինձ ուղեկցել է իմ ողջ կյանքի ընթացքում»,- գրադարանի տպավորությունների գրքում գրել է լեռնամետալուրգիական կոմբինատի էլեկտրոլիզի արտադրության պետ վաղամեռիկ Աշոտ Մկրտումյանը: Այսօրվա հաճախորդներից է «Արմենիան Քափըր Փրոգրամ» ընկերության մետալուրգիական արտադրամասի պետի օգնական Վարուժան Հարությունյանը. «Երկու տարի է՝ օգտվում եմ գրադարանից, շատ գոհ եմ: Գիրքը միշտ էլ պետք է, կարծում եմ՝ ինտերնետը չի կարող փոքրացնել գրքի պահանջը, հատկապես նախկին գրականության պահանջը, որի մասին այսօր ինտերնետից չես կարող իմանալ»:
Թե ստեղծման առաջին օրերին, թե այսօր գրադարանից օգտվում են ոչ միայն մետալուրգները: 1970-ից այս գրադարանը տարածաշրջանում բազային եւ հենակետային գրադարան է եղել: Ընթերցողների թիվն այստեղ խորհրդային տարիներին հասել է 1200-ի, ներկայումս 800 է: Գրադարանը կապված է եղել 108 հրատարակչությունների եւ գրքի առաքման կենտրոնների հետ, գրականությունն ամբողջությամբ տեխնիկական է, ունի մետալուրգիական եւ գիտության առանձին ճյուղերի վերաբերյալ գրականություն: Կոմբինատի 47 աշխատողներ գրադարանի օգնությամբ պաշտպանել են թեկնածուական եւ դոկտորական ատենախոսություններ:
«Գրադարանից ակտիվորեն օգտվում է «Արմենիան Քափըր Փրոգրամ» ընկերության գործադիր տնօրեն Գագիկ Արզումանյանը: Նրա ձեռքին այս պահին 15 մասնագիտական գիրք կա: Շատ են օգտվում նաեւ պղնձաձուլական գործարանի արտադրության պետ Նիկոլայ Պետրովիչը, բոլոր արտադրամասերի պետերը, շարքային աշխատողները: Մեր ընթերցողներն են նաեւ տարածաշրջանի միջնակարգ մասնագիտական հաստատությունների, բուհերի եւ հատկապես Երեւանի պոլիտեխնիկական ինստիտուտի ուսանողները»,- ասում է գրադարանի աշխատակցուհի Հայկուշ Շաքարյանը:
Միջազգային ֆինանսատնտեսական ճգնաժամը անորոշ է դարձրել ընկերության ճակատագիրը, ու անորոշ է նաեւ գրադարանի ապագան: Այս մասին խոսելիս՝ գրադարանի աշխատակցուհին նկատեց. «Անցած ծանր տարիներին գրադարանից ոչինչ դուրս չի գնացել եւ ոչինչ չի պակասել»:
