Իրավունքների նոր սահմանափակում
![\"\"](\"https://www.aravot.am/2009/aravot_arm/March/24/p6.jpg\")
Մարատ Դադունցն առաջարկում է հրաժարվել հանրահավաքներից:
Անցած շաբաթավերջին Երեւանում տեղական եւ միջազգային կառույցների ներկայացուցիչները քննարկում էին Հայաստանում մարդու իրավունքների վիճակը: Երկու օրերի վեց նիստերի ընթացքում բազմաթիվ անգամ նշվեց, որ հանրահավաքների ազատությունը չի կարելի սահմանափակել: Այս հավաքին մասնակցում էր նաեւ Գորիսում գործող «Իրավունքների տեղեկատվական կենտրոն» հ/կ նախագահ Մարատ Դադունցը, ում կարծիքով, 21-րդ դարում կարելի է հրաժարվել հանրահավաքներից:
Մեզ հետ զրույցում Մարատ Դադունցն ասաց, որ պետության ծագմանը զուգահեռ է ծնվել հանրահավաքը, եւ 21-րդ դարում կարելի է այլ տեխնոլոգիաներով բողոք արտահայտել. «Պարտադիր չէ մարդկանց բարձրախոսներով հրավիրել փողոց: Եթե բոլորը համակարծիք են, որ այսինչ խնդիրը կա, բողոքի ձեւ կարելի է գտնել՝ թեկուզ բնապահպանների նման մեկ ժամով լույսը անջատելը, կամ հեռախոսը մեկ ժամով անջատելը, կամ բանկերի ծառայություններից մեկ օր չօգտվելը: Սրանք նույնպես անհնազանդության ձեւեր են»:
Մեր զրուցակիցը կարծում է, որ եթե, այնուամենայնիվ, հանրահավաք է արվում՝ չպետք է արվի այլոց իրավունքների սահմանափակման հաշվին: Հանրահավաքներից շատ առաջ մարդիկ այլ բաներ էլ են արել ու հիմա էլ են նույնը անում, օրինակ՝ աղոթում են կամ սեքսով են զբաղվում, չանե՞նք, մեր այս հարցին ի պատասխան Մարատ Դադունցն ասաց, որ ինքը խոսում է կարծիք արտահայտելու համար նոր տեխնոլոգիաներ օգտագործելու մասին: Իսկ նոր տեխնոլոգիաներն, ըստ նրա, կարող են մարդուն զերծ պահել սխալվելուց, երբ հանրահավաքի բերած էմոցիաների ազդեցության տակ մարդը ծափահարում է մեկին, «ով ընդհանրապես արժանիքներ չունի»:
