«Օդնոկլասնիկի գործի» դատաքննությունն ավարտվեց
![\"\"](\"https://www.aravot.am/2009/aravot_arm/March/24/p17.jpg\")
Վ. Աբրահամյանը հրապարակեց դատավճիռը:
Աջափնյակ եւ Դավիթաշեն համայնքների ընդհանուր իրավասության դատարանը՝ նախագահությամբ Վարդան Աբրահամյանի, երեկ հրապարակեց «Օդնոկլասնիկ» սրճարանի ծեծկռտուքի արդյունքում սպանված Անդրանիկ Բաբայանի գործով դատավճիռը: Սահակ Ազիզբեկյանը դատապարտվեց 8 տարի 6 ամիս ազատազրկման, Սամվել Ալիխանյանը՝ 2 տարի 6 ամսվա, իսկ Արմեն Սարգսյանը՝ 6 ամսվա ազատազրկման: Տուժող Աբել Միքայելյանը եւ տուժող Անդրանիկ Բաբայանի իրավահաջորդը քաղհայց չէին ներկայացրել:
Դատավճռի հրապարակումից հետո զրուցեցինք Անդրանիկի հարազատների հետ: Նրա կինը՝ Աննա Մովսիսյանն, ասաց, որ իր համար այդպես էլ անհայտ մնաց, թե ովքեր, ինչու եւ որտեղ են իր ամուսնուն սպանել, քանի որ եղել է արագացված դատաքննություն, ընդամենը 3 նիստ, որոնցից միայն առաջին նիստի օրվա եւ ժամի մասին են իրենք պատշաճ ծանուցվել: «Ոչ վկաներ բերեցին, ոչ բան, ոչ մի մանրամասնություն չգիտենք: Իրենք ինչ ուզեցին՝ արեցին: Ինձ թվում է՝ այս ամենը շոու էր, նույնիսկ մեղադրյալները հենց իրենք չէին, ինձ թվում է՝ նրանք «ախրանայի» աշխատող էլ չէին: Պարզապես մարդիկ էին, ովքեր իրենց վրա էին վերցրել մեղքը: Հնարավոր չէր, որ էդ ֆիզիկական տվյալներով անձն իմ ամուսնուն կարողանար էդ վիճակին հասցնել»,- ասաց Աննա Մովսիսյանը, ավելացնելով, որ նույնիսկ դատավճիռը բողոքարկելու իմաստ էլ չեն տեսնում:
Տուժող Աբել Միքայելյանի եւ լրագրող Արթուր Սահակյանի (որին պատժելու համար էին սափրագլուխները եկել սրճարան) բացակայության հանգամանքն էլ Աննան տարօրինակ է համարում. չգիտի՝ նրանք խուսափում են իրենց հետ առերես հանդիպելո՞ւց, թե՞ վախեցել են եւ մեկնել են հանրապետությունից: «Իրական մեղավորները կամ իրենց տանը նստած են, կամ ռեստորանում իրենց հաղթանակն են տոնում»,- ասացին հարազատները, նկատելով, որ դատապարտվողներից Արմեն Սարգսյանի 6 ամիսն արդեն լրանում է եւ նա շուտով ազատ կարձակվի:
