Երեկ «Հայ կամավորականների համախմբում» նախաձեռնության համակարգող Ժիրայր Սեֆիլյանը հաստատեց շրջանառվող լուրերը, թե Երեւանի ավագանու եւ քաղաքապետի ընտրությունների՝ Հայ ազգային կոնգրեսի ցուցակում իրենց հատկացված տեղերը իրենք տվել են «Ժառանգություն» կուսակցությանը։ Ըստ Ժիրայր Սեֆիլյանի, նման որոշումը կայացվել է Հայ ազգային կոնգրեսի եւ «Ժառանգության» միակամության պահպանման համար։ Կոնգրեսական մյուս քաղաքական ուժերին էլ պարոն Սեֆիլյանը կոչ է անում նույն կերպ վարվել։ «Սրանք ուղղակի քաղաքապետի ընտրություններ չեն, այլ մեկ տարի առաջ եղած նախագահական ընտրությունների շարունակությունն են։ Այս ընտրություններին պետք է համապետական նշանակություն տալ»,- ասաց Ժիրայր Սեֆիլյանը, ով կարծում է, որ այս ընտրությունների միջոցով պետք է շարունակել պայքարն ու հասնել իշխանությունների հրաժարականին։ Նա նույնպես կարծում է, որ «Ժառանգություն»-ՀԱԿ միավորումը դեռեւս հնարավոր է, մանավանդ որ՝ բանակցությունները դեռ ավարտված չեն:
