Մրցակցուհիները հայտնի դարձան
ՀՖՖ մամուլի քարտուղարությունը տեղեկացնում է, որ Նյոնում (Շվեյցարիա) կայացել է ՖԻՖԱ-ի կանանց աշխարհի գավաթի որակավորման փուլի վիճակահանությունը: Հայաստանի կանանց ազգային հավաքականն ընդգրկվել է 7-րդ խմբում, որտեղ նրա մրցակիցներն են Իտալիան, Ֆինլանդիան, Պորտուգալիան եւ Սլովենիան:
Որոշվել է նաեւ մրցաշարի խաղացանկը: Խմբում պայքարը մեր ֆուտբոլիստուհիների համար սկսվելու է սեպտեմբերի 19-ին: Այդ օրը մեզ հյուրընկալվելու է Ֆինլանդիան: Մյուս հանդիպումները կայանալու են հետեւյալ օրերին.
24.10.09՝ Հայաստան-Իտալիա
28.10.09՝ Հայաստան-Սլովենիա
21.11.09՝ Ֆինլանդիա-Հայաստան
25.11.09՝ Իտալիա-Հայաստան
27.03.10՝ Սլովենիա-Հայաստան
31.03.10՝ Պորտուգալիա-Հայաստան
25.08.10՝ Հայաստան-Պորտուգալիա:
Տոմսերն արդեն վաճառվում են
ՀՖՖ մամուլի քարտուղարության երեկ տարածած տեղեկատվության համաձայն, արդեն վաճառվում են 2010 թվականին Հարավային Աֆրիկայում կայանալիք ֆուտբոլի աշխարհի առաջնության եզրափակիչ մրցաշարի որակավորման փուլի Հայաստան-Էստոնիա հանդիպման տոմսերը: Մարտի 28-ին Վազգեն Սարգսյանի անվան «Հանրապետական» ստադիոնում կայանալիք այդ խաղին հարավային եւ հյուսիսային տրիբունաներից հետեւել ցանկացողները պիտի վճարեն 3 հազար դրամ: Արեւելյան տրիբունայում մեկ տեղն արժե 5 հազար դրամ, իսկ արեւմտյան տրիբունայում՝ 7 հազար դրամ:
Ինչպիսի՞ն կլինեն պատասխանները
Երեկ կայացան ֆուտբոլի Հայաստանի գավաթի խաղարկության մեկնարկային՝ քառորդ եզրափակիչի երկրորդ զույգի հանդիպումները:
«Բանանցը» 2:0 հաշվով հաղթեց առայժմ գործող գավաթակիր «Արարատին», իսկ Աշտարակի «Միկան» 3:1 հաշվով առավելության հասավ Գյումրիի «Շիրակի» նկատմամբ: Մեկնարկային հանդիպումներում արձանագրված հաշիվների տարբերությունից դատելով՝ պարտվող թիմերից պատասխան խաղերում լուրջ ջանքեր են պահանջվելու երկու հանդիպումների ընդհանուր հաշվով կշեռքի նժարն իրենց կողմը թեքելու եւ հետագայում պայքարը շարունակելու իրավունք նվաճելու համար:
Հաջորդը Ռաֆայել Նադալն է
Ինդիան Ուելսում ընթացող թենիսի միջազգային հեղինակավոր ավանդական մրցաշարում, որին մասնակցում են աշխարհի լավագույն թենիսիստները, արգենտինացի Դավիթ Նալբանդյանը շարունակում է հաջող մրցելույթներ ունենալ: Նա երրորդ փուլում 6:4, 6:2 հաշվով հաղթեց սերբ Վիկտոր Տրոիցկուն եւ հաջորդ շրջանում հանդիպելու է աշխարհի թիվ մեկ ռակետ՝ իսպանացի Ռաֆայել Նադալի հետ:
