Մարտի 27-ին Մելբուռնի «Ալբեր Պարկում» Ավստրալիայի «Գրան պրի» մրցաշարով կտրվի աշխարհի ամենադիտարժան ու թանկ մարզաձեւի՝ «Formula 1»-ի, 2009 թվականի առաջնության մեկնարկը:
Համաշխարհային ավտոարտադրության ամենահեղինակավոր ընկերությունների թիմերը, տարվա ընթացքում տարբեր մայրցամաքներում հանդես գալով 17 «Գրան պրի»-ներում, կորոշեն թիմային եւ անհատական հաղթողներին:
Դեռ մրցաշրջան 2008-ի ավարտին մտավախություն կար, որ հաջորդ առաջնությունում մասնակից թիմերի թիվը կարող է մեկով պակասել: Խոսքը հանրահռչակ ճապոնական «Honda» ավտոկոնցեռնի մասին է, որի տերերը դեկտեմբերին հայտարարել էին համաշխարհային ճգնաժամի պատճառով մարզական այս ծրագրից հրաժարվելու եւ թիմը վաճառելու մտադրության մասին: Եվ ահա Մելբուռնից երեք շաբաթ առաջ լրատվամիջոցները տեղեկացնում են, որ թիմը գնել է «Ferrari»-ի նախկին տեխնիկական տնօրեն Ռոսս Բրաունը եւ թիմն այս տարի հանդես կգա արդեն «Brawn GP» անունով: Ինչ վերաբերում է նոր թիմի առաջատար արշավորդներին, որոնք անհատական պայքարում ի վիճակի են պայքարել չեմպիոնության համար, «Brawn GP»-ի մարզական գույների (սեւ, դեղին, սպիտակ) պատիվը կպաշտպանեն բրազիլացի Ռուբենս Բարիկելլոն եւ բրիտանացի Ջենսոն Բատտոնը:
