![\"\"](\"https://www.aravot.am/2009/aravot_arm/March/13/p15.jpg\")
Հայաստանի գիրք տարածողների ազգային ասոցիացիայի «Գրքերի աշխարհ» ամսաթերթը որոշել է 2008 թվականի գլխավոր բեսթսելերները: Լավագույն վաճառվող գրքերը՝ բեսթսելերները, որոշվել են՝ հաշվի առնելով տարվա ընթացքում գնայուն գրքերի տասնյակներում նրանց զբաղեցրած հորիզոնականները, վաճառքի քանակը եւ այն, թե այս կամ այն գիրքը քանի անգամ է հայտնվել բեսթսելերների տասնյակում եւ որքան երկար է մնացել:
«Գրքերի աշխարհ» ամսաթերթը համապատասխանաբար գեղարվեստական եւ ոչ գեղարվեստական գրքերի գնայուն տասնյակի համար որոշել է երեք անվանակարգ՝ «Տարվա բեսթսելեր», «Տարվա ազգային բեսթսելեր» եւ «Տարվա թարգմանական բեսթսելեր»: Հայ հեղինակների հայերեն գրքերի համար որոշված «Տարվա ազգային բեսթսելեր» անվանակարգում գեղարվեստական գրքերից լավագույնը համարվել է Գրիգոր Նարեկացու «Մատյան ողբերգության» պոեմը, իսկ ոչ գեղարվեստական գրքերի մեջ՝ Համլետ Դավթյանի «Մեզ անծանոթ Վարդանանց պատերազմը» գիրքը: Հոգու եւ մտքի համար գրված այս գործերն են դարձել հայկական գրքի շուկայի ամենակայուն գնայուն գրքերը, ինչը նշանակում է, թերեւս, որ ժամանակակից ընթերցողը, այնուամենայնիվ, նախընտրում է արժեքավորը:
