ԲՈԼՈՐՆ ԷԼ 100-Ի ՄԵՋ ԵՆ
![\"\"](\"https://www.aravot.am/2009/aravot_arm/March/12/p3.jpg\")
Սանկտ Պետերբուրգում շարունակվող կանանց Եվրոպայի 10-րդ առաջնության երրորդ տուրում մեր հանրապետության շախմատիստուհիները հաջող հանդես եկան: Հաղթանակ տոնեցին Լիլիթ Մկրտչյանը, Սիրանուշ Անդրեասյանը եւ Աննա Հայրապետյանը, իսկ Լիլիթ Գալոյանն ու Նելլի Աղինյանը բաժանեցին միավորը:
Երեք տուրից հետո Լիլիթ Մկրտչյանը եւ Նելլի Աղինյանը 2,5-ական միավորով ընթանում են, համապատասխանաբար, 11-րդ եւ 25-րդ հորիզոնականներում: Լիլիթ Գալոյանը 47-րդն է, Սիրանուշ Անդրեասյանը՝ 88-րդը, Աննա Հայրապետյանը՝ 97-րդը:
Չորրորդ տուրում, որը կայացավ երեկ, Աղինյանը սպիտակներով խաղում էր մեր «Միկա» ակումբում իր թիմակից Նինո Խուրցիձեի հետ: Մեր մյուս աղջիկների զույգերն էին. Լիլիթ Մկրտչյան-Իրինա Տուրովա (Ռուսաստան), Ալինա Բալայան (Ռուսաստան)-Լիլիթ Գալոյան, Իլզե Բելզինա (Լատվիա)- Սիրանուշ Անդրեասյան, Աննա-Մարիա Բոտսարի (Հունաստան)- Աննա Հայրապետյան:
ԷԼԻՆԱՆ ՀԱՂԹԵՑ ՉԻԲՈՒՐԴԱՆԻՁԵԻՆ
Տասներկու գրոսմայստերներ Ստամբուլում պայքարն են շարունակում ՖԻԴԵ-ի «Գրան պրի» մրցաշարի առաջին փուլի հաղթողին որոշելու համար: Հայաստանի ներկայացուցիչ Էլինա Դանիելյանը 4-րդ տուրում սեւ խաղաքարերով գեղեցիկ ոճով առավելության հասավ աշխարհի բազմակի չեմպիոն Մայա Չիբուրդանիձեի (Վրաստան) նկատմամբ եւ 2,5 միավորով 12 մասնակիցների մրցաշարային աղյուսակում բարձրացավ 5-րդ տեղ:
Երեկ շախմատիստուհիները հանգստանում էին: Իսկ այսօր Դանիելյանը հանդիպելու է ադրբեջանցի Զեյնաբ Մամեդյարովայի հետ:
ՏԱՐԲԵՐՈՒԹՅՈՒՆԸ ԿԵՍ ՄԻԱՎՈՐ Է
Չեռնոգորիայի Բուդվա քաղաքում ընթացող շախմատի տղամարդկանց Եվրոպայի 10-րդ առաջնության 5-րդ տուրում Դրեզդենի շախմատի համաշխարհային օլիմպիադայի հաղթող, գրոսմայստեր Տիգրան Պետրոսյանը հերթական մեկ միավորը վաստակեց: Հաղթանակ տարավ նաեւ Արման Փաշիկյանը: Մեր շախմատիստների առաջատար Վլադիմիր Հակոբյանը բավարարվեց կես միավորով, իսկ Տիգրան Քոթանջյանը, Արտաշես Մինասյանն ու Արթուր Չիբուխչյանը կրկին պարտություն կրեցին:
Վեցերորդ տուրից առաջ մեր տղաներից լավագույնը Տիգրանն էր: Նա 4,0 միավորով զբաղեցնում էր 24-րդ տեղը եւ առաջատարներ Սանան Սյուգիրովից, Էռնեստո Ինարկիեւից ու Գեորգ Մեյերից ետ էր մնում ընդամենը կես քայլ: Երեկ ուշ երեկոյան Տիգրան Պետրոսյանն ուժերը չափում էր ուկրաինացի ճանաչված գրոսմայստեր Անդրեյ Վոլոկիտինի հետ:
