![\"\"](\"https://www.aravot.am/2009/aravot_arm/March/12/p12.jpg\")
Ամերիկյան Ալաբամա նահանգում մի զինված տղամարդ սպանել է առնվազն 10 հոգու: Նահանգի փոքրիկ քաղաքներ Սամսոնի եւ Ժնեւի բնակիչները ցնցված են կատարված ողբերգության պատճառով: Ոստիկանությունն առայժմ չի կարողացել պարզել, թե ինչն է ստիպել տղամարդուն կատարել այդ հանցագործությունները:
Ենթադրվում է, որ մարդասպանի զոհերի մեծ մասը նրա բարեկամներն էին: Նախնական տվյալներով, սկզբից տղամարդը սպանել է հարազատ մորը, որի դիակը հայտնաբերվել է հրկիզված տանը: Այնուհետեւ Սամսոնի գազալցման կայանում գնդակահարել է մի կնոջ եւ մոտակայքում ապրող եւս 5 հոգու: Ճանապարհին բախվել է ոստիկանների հետ եւ սկսվել է փոխհրաձգություն, որի արդյունքում Ժնեւի շերիֆը վիրավորվել է: Հասնելով Ժնեւ՝ տղամարդը գնդակահարել է եւս 2 հոգու՝ տեղի շերիֆի տեղակալի կնոջն ու երեխային: Երբ ոստիկանությանը վերջապես հաջողվել է նրան շրջապատել՝ հանցագործն ինքնասպանություն է գործել: Հետաքննությունների դաշնային բյուրոն իր գործակալին է ուղարկել՝ քննությանն աջակցելու համար:
Երեկ համանման մի դեպք էլ Գերմանիայում է տեղի ունեցել: Մտնելով Շտուտգարդին հարակից Վինենդեն փոքրիկ քաղաքի միջնակարգ դպրոցը, հանցագործը, որն այդ դպրոցի նախկին սան է, կրակ է բաց արել, որի արդյունքում, նախնական տվյալներով զոհվել է 16 մարդ: Ոստիկանների հետ փոխհրաձգության արդյունքում մարդասպանն էլ է սպանվել:
