Ժնեւում տեղակայված «Եվրատեսիլ» մրցույթի վերստուգիչ խումբը թույլ չի տվել Մոսկվայում կատարել «We don’t wanna put in» երգը, որը պատրաստվում էր ներկայացնել վրացական «Ստեֆանե եւ 3G» խումբը: Ինչպես հայտնում է «Ռեգնումը», Հեռարձակման եվրոպական միությունը պաշտոնապես տեղեկացրեց այդ մասին վրացական կողմին: Վրաստանը մինչեւ մարտի 16-ը պետք է կամ փոխի երգի տեքստը, կամ մեկ այլ երգ ընտրի: Ինչպես հայտնի է, ավելի վաղ ռուսական կողմը «put in» անգլերեն բառակապակցության մեջ նմանություն գտավ Ռուսաստանի վարչապետի ազգանվան հետ եւ երգի տեքստում վիրավորական ակնարկներ հայտնաբերեց: Նախորդ տարի Սերբիայում Վրաստանը ներկայացրած երգչուհի Դիանա Գուրցկայան նույնպես դեմ արտահայտվեց երգի տեքստին եւ հայտարարեց, որ չի պատրաստվում էստաֆետը փոխանցել վրացական խմբին: Վրաստանում անցկացրած սոցիոլոգիական հարցումների համաձայն, բնակչության համարյա 85%-ը դեմ է երգի խոսքերը փոխելուն: «Եվրատեսիլի» վրացական պրոդյուսեր Նադիա Ուզնաձեն հերքեց ռուսաստանյան ԶԼՄ-ների այն տեղեկատվությունը, թե իբր երգի խոսքերը փոխվելու են. «Երգի տեքստում որեւէ քաղաքական կամ վիրավորական բան չկա: Դուք ինքներդ կարող եք դրանում համոզվել: Համապատասխանաբար՝ խոսք չի կարող լինել տեքստը փոխելու մասին»:
Ուշ երեկոյան ռուսական լրատվամիջոցները հաղորդում էին, որ Վրաստանը հրաժարվել է մասնակցել Մոսկվայում կայանալիք «Եվրատեսիլ- 2009»-ին:
