Դրվագներ երեկ «Հայելի» ակումբում «Ժառանգություն» խմբակցության քարտուղար Լարիսա Ալավերդյանի եւ ՀՀԿ խմբակցության պատգամավոր Սուքիաս Ավետիսյանի բանավեճից:
«Առավոտ» Պարոն Ավետիսյան, Լարիսա Ալավերդյանն ասել էր, թե այն, ինչ Դուք հայտարարեցիք փետրվարի 24-ին ԱԺ ամբիոնից՝ զրպարտություն է եւ սուտ, եւ եթե ներողություն չխնդրեք, ապա դրան կտրվի իրավական ընթացք: Դուք պատրաստվո՞ւմ եք ներողություն խնդրել:
Սուքիաս Ավ. Ինչի՞ համար: Ճշմարտությունն ասելու համար, իմ կարծիքով, ոչ ոք ներողություն չի խնդրել: Ես ընդամենը շատ պարզ բան եմ ասել. այո՛, «Ժառանգությունն» այսօր չի կարող հրաժարվել, որ ինքը համագործակցում է իշխանությունների հետ:
«Առավոտ» Դուք ԱԺ ամբիոնից խոսել եք ոչ թե իշխանությունների հետ համագործակցելու, այլ կոնկրետ նախագահի դուռը վազելու մասին:
Սուքիաս Ավ. Նախագահն իշխանությո՞ւն չի:
«Առավոտ» Իշխանության մի մասն է: Դուք կարո՞ղ եք փաստերով ապացուցել, որ «Ժառանգության» պատգամավորները վազել են նախագահ Սերժ Սարգսյանի դուռը:
Սուքիաս Ավ. Չեմ ուզում կոնկրետ օրինակներով խոսել: Իսկ եթե դրա անհրաժեշտությունն ունենա «Ժառանգություն» խմբակցությունը՝ կարող ենք խոսել օրինակներով:
Լարիսա Ալ. Այդ անհրաժեշտությունը կա, եւ ես կխնդրեի, որ այստեղ պարզ հայերենով ասեք, թե ով եւ երբ է վազել նախագահի դուռը:
Սուքիաս Ավ. Ես կարծում եմ, որ միշտ էլ խոսել եմ պարզ հայերենով: Ինքս ականատես եմ եղել, երբ որ միջոցառումներից մեկի ժամանակ Արմեն Մարտիրոսյանը եւ Անահիտ Բախշյանը մի քանի անգամ մոտեցել են նախագահին՝ ինչ-որ խնդրով:
Լարիսա Ալ. Միջոցառմանը մասնակցելը «Ժառանգության» սուրբ պարտականությունն է: Եթե Դուք ունեք տեղեկություն, որ նրանք վազել են դուռը, այլ ոչ թե միջոցառման ժամանակ մոտեցել շնորհավորելու կամ որեւէ այլ առիթով՝ ես կխնդրեի, որ գրավոր ներկայացնեիք: Հակառակ պարագայում շարունակելու եմ պահանջել, որ Դուք իրավական առումով պատասխան տաք: «Նախագահի դուռ» արտահայտությունը էթիկական նորմերից դուրս է, ես ասել ու կրկնում եմ՝ դա իրոք «մայլի տղայի» բանաձեւ է: Նախ եւ առաջ, նախագահը պաշտոնատար անձ է: «Ժառանգությունն» օրենսդիր մարմնի մաս է: «Ժառանգությունն» իրականացնելու է իր բոլոր լիազորությունները, եւ երբ որ պետք է դիմել՝ դիմելու է: Բայց «վազել դուռը» արտահայտությունը հայերենում ուրիշ բան է նշանակում՝ ես դրա համար շեշտեցի «պարզ հայերենը»: Ես եւս մեկ անգամ առաջարկում եմ եւ դա գրավոր առաջարկելու եմ ՀՀԿ խմբակցության քարտուղար Սամվել Նիկոյանին, որ ներողություն խնդրեք Ձեր շատ կոպիտ արտահայտության համար: Այն փաստը, որ «Ժառանգությունը» կարող է ու պարտավոր է գնալ իշխանավորի մոտ եւ արտահայտել քաղաքացու պահանջը կամ բողոքը, կարծում եմ, որ դուռ վազել չի:
«Հայելիի» ղեկավար. Բացառո՞ւմ եք, որ նրանք մոտեցել են անձնական խնդրանքով:
Լարիսա Ալ. Ես ոչ միայն բացառում եմ, այլ նաեւ գտնում եմ…
Սուքիաս Ավ. Գիտե՞ք ինչ կա, եկեք չմասնավորեցնենք: Կապ չունի՝ անձնակա՞ն խնդրանքով էր, թե՞ ընդհանուր հարցերով:
«Առավոտ» Ինչպե՞ս թե կապ չունի:
Սուքիաս Ավ. Բացատրեմ՝ ինչու կապ չունի: Տիկին Ալավերդյանն ասում է, որ, այո՛, որպես «Ժառանգություն» խմբակցություն, որպես պատգամավոր իրենք պարտավոր են շատ հարցերով գնալ ընդհուպ մինչեւ նախագահը:
Լարիսա Ալ. Նախ դա չի նշանակում վազել դուռը: Եվ ես չեմ ասել՝ «ընդհուպ նախագահը»:
Սուքիաս Ավ. Ես ուրեմն ասում եմ, եթե որեւիցե պատգամավոր այդ ամբիոնից հայտարարում է, թե նախագահը լեգիտիմ չէ, ապա կստանա նույն պատասխանը, ոնց որ ես տվել եմ փետրվարի 24-ին: Ես չեմ հրաժարվում իմ խոսքերից: Ցանկացածի նման ելույթի դեպքում նույն պատասխանը կտամ:
Լարիսա Ալ. Այսինքն՝ պնդում եք, որ կարելի է զրպարտանքո՞վ հանդես գալ…
Սուքիաս Ավ. Այո՛, եթե ասում եք, որ նախագահը լեգիտիմ չէ, ուրեմն պարտավոր չեք գնալ նախագահի մոտ՝ թեկուզ ընդհանուր հարցերով:
Լարիսա Ալ. Կրկնում եմ, բերեք մեկ փաստ… Մինչ այսօր՝ մեկ տարվա ընթացքում, «Ժառանգությունից» որեւէ պատգամավոր որեւէ անգամ պաշտոնական հարցով չի դիմել երկրի նախագահին: Այս առումով Ձեր ասածը զրպարտանք է: Խիզախություն է պահանջվում՝ շատ հասարա՛կ, մարդկայի՛ն, ոչ թե պատգամավորական՝ ասելու համար, որ կարող է պատահի՝ ուզում էիք ասել այն, ինչ հետո թերթերին եք ասել. թե նրանք գնում են իշխանության մոտ: Այո՛, գնում ենք եւ պարտավոր ենք գնալ: Բայց Ձեր արտահայտությունը ամբիոնից եղել է՝ «Երբ որ իրենց պետք է, նրանք վազում են նախագահի դուռը»: Նախագահի դուռը վազում է շունը եւ ոչ թե մարդը: Ես պահանջում եմ Ձեզնից ներողություն:
Սուքիաս Ավ. Ներողություն չի՛ լինի: Ներողություն կլինի միայն այն ժամանակ, եթե ձեր «Ժառանգության» ներկայացուցիչը ներողություն խնդրի:
Լարիսա Ալ. Ինչի՞ համար:
Սուքիաս Ավ. Որ ասել է՝ նախագահը լեգիտիմ չէ: (Հիշեցնենք, որ այդ հայտարարությունն արել էր Անահիտ Բախշյանը.- Ա. Ի.):
Լարիսա Ալ. Այն, որ երկրի նախագահը լեգիտիմության պակաս ունի՝ որեւէ մեկի համար հարց չէ մեկընդմի՛շտ:
Սուքիաս Ավ. Դա ձե՛ր կարծիքն է:
Լարիսա Ալ. Եվ մեր կարծիքն արտահայտելու իրավունքն ունենք:
Սուքիաս Ավ. Ես էլ իմ կարծիքն արտահայտելու իրավունք ունեմ:
Լարիսա Ալ. Դա կարծիք չէ, դա զրպարտանք է: Դուք իրավունք ունեիք ասելու, որ նախագահը լրիվ լեգիտիմ է:
«Հայելիի» ղեկավար. Խնդիրն ա՞յն է, որ ասել է՝ «վազել են նախագահի դուռը», եւ եթե ասեր, որ հանդիպում են նախագահին՝ վիրավորանք չէի՞ք համարի:
Լարիսա Ալ. Անգամ հանդիպումը տեղի չի ունեցել: Ոչ ոք չի գնացել Սերժ Սարգսյանի մոտ՝ որպես երկրի նախագահի, եւ որեւէ հարցով:
Սուքիաս Ավ. Բա որպես ի՞նչ են գնացել, որպես ՀՀԿ ղեկավարի՞… Միգուցե «Ժառանգությանը» շատ վրդովվեցրել է «դուռ» բառը:
Լարիսա Ալ. Դուք հայերեն լավ չգիտեք.: «Դուռ վազելը» վիրավորական արտահայտություն է: Կներեք, պատգամավորը չի վազում: Պատգամավորը կարող է հանդիպում ունենալ: Դուք կարող էիք ասել, որ պատգամավորները երբ լինում է խնդիր՝ հանդիպում են նախագահի հետ… Եթե ընդունում եք, որ Դուք ամեն օր վազում եք բոլորի դռները, եւ դա Ձեզ ձեռք է տալիս, Ձեզ համար լավ է՝ ես միայն այդպես կարտահայտվեմ Ձեր մասին:
«ՉԻ» Բայց հենց միջազգային կազմակերպություններն են, չէ՞, քանի անգամ ասել, որ ՀՀ նախագահը լեգիտիմության խնդիր ունի:
Սուքիաս Ավ. Նույն պատասխանը ես կարող եմ տալ միջազգային կազմակերպություններին էլ:
«ՉԻ» Այդ դեպքում ինչո՞ւ եք նույն այդ միջազգային կազմակերպություններից դրամական օգնություն մուրում:
Սուքիաս Ավ. Չե՛նք մուրում:
Լարիսա Ալ. Դա, այո՛, փող մուրալ է: Իմ հայտարարությունն ուժի մեջ է, որ կոպիտ ու ոչ էթիկական արտահայտության համար եթե Սուքիաս Ավետիսյանը իր մեջ խիզախություն գտնի՝ ներողություն կխնդրի: Եթե ոչ՝ մենք դրան տալու ենք իրավական ընթացք:
