Դաստիարակները վերապատրաստվեցին

Երեկ «Մխիթար Սեբաստացի» կրթահամալիրում կայացավ 2009 թ. փետրվարի 9-20-ը «Մխիթար Սեբաստացի» կրթահամալիրում «Նախնական ուսուցումը որպես հինգ տարեկանների ծրագրված զարգացման արդյունք» նախագծով անցկացված վերապատրաստման ամփոփումը: Վերապատրաստմանը մասնակցել էին Երեւան քաղաքի Նոր Նորք, Նորք-Մարաշ, Նուբարաշեն համայնքների նախադպրոցական հաստատությունների մանկավարժներ եւ Ծրագրին դիմած 36 մասնագետներ: Վերապատրաստումն անցկացվել է 2 խմբով, խմբերն աշխատել են կրթահամալիրի Բ/4թ. դպրոց-պարտեզում: Ամփոփումից հետո մասնակիցներին հանձնվեցին վկայագրեր:

Պատասխանում է ԳԹԿ-ն

Մեր ընթերցողների խնդրանքով երեկ դիմեցինք ԳԹԿ-ին, հետեւյալ հարցով՝ «Եթե դիմողը ոչ հանրակրթական դպրոցի (ուսումնարան, քոլեջ եւն) շրջանավարտ է, ապա ինչպե՞ս է մասնակցում միասնական քննություններին»: Գնահատման եւ թեստավորման կենտրոնի մշակումների եւ կազմակերպական բաժնի գլխավոր մասնագետ Կարինե Հայրապետյանը պատասխանեց. «Քոլեջի կամ ուսումնարանի շրջանավարտը դիմում է իր տնօրենին եւ տվյալ ուսումնական հաստատությունում սահմանված կարգով լրացնում է դիմում-հայտը, այն վավերացնում է հաստատության ղեկավարը: Շրջանավարտն անձամբ փաստաթղթերի փաթեթը ներկայացնում է ԳԹԿ»:

Բազե-CLUB

Երեկ նորաստեղծ Համահայկական երիտասարդական կենտրոնի մշակութային դահլիճում (Աբովյան 50/5) կայացավ Համահայկական երիտասարդական հիմնադրամի «Բազե» երիտասարդական ակումբի բացման պաշտոնական արարողությունը, որին մասնակցում էին ակտիվ բազեականներ՝ պաշտոնյաներ, քաղաքական ու մշակութային գործիչներ, տարբեր մասնագիտությունների տեր երիտասարդներ: Ակումբի գործունեության շրջանակը լինելու է ընդգրկուն՝ պետական ու հասարակական դաշտի հետ համագործակցելուց, միջոցառումներ կազմակերպելուց՝ մինչեւ պարբերականների հրատարակում:

Գիրք՝ ընդհատակից

«Շեմ» հրատարակչությունը Երիտասարդ պահպանողականների միության կողմից Հյուսիսային պողոտայում կազմակերպած հանգանակության միջոցներով հրատարակել է Լեոյի «Անցյալից» հուշագրությունը։ Գրքի խմբագրումը, առաջաբանը, ծանոթագրումները, հավելվածներն ու էջադրումը իրականացվել են 2008-ի մարտի 1-ից քաղաքական ընդհատակում գտնվող Պահպանողական կուսակցության նախագահ Միքայէլ Հայրապետեանի կողմից։

Ըստ հրատարակիչների՝ Լեոյի այս գործը լավագույնս է պատասխանում այն հիմնահարցերին, որոնք այսօր եւս ծառացած են հայության առջեւ: Ինչպես նշում է Մ. Հայրապետեանը. «Պատմությունն իր ողբերգական դրվագներով կրկնվում է այն ժողովուրդների համար, որոնք այն չեն կերտում»: Հրատարակությունը նվիրված է 2008թ. մարտի 1-ի զոհերի հիշատակին:

Վտանգավոր դպրոց

«Վերանորոգվում են ավելի բարվոք վիճակում գտնվող դպրոցներ, իսկ մեր դպրոցը, որ կիսատ թողած շինաշխատանքների պատճառով լուրջ վտանգ է իրենից ներկայացնում, չի վերանորոգվում: Մեծ հույսեր ունեմ, ովքեր մեր այս վիճակը տեսել են, մանավանդ, եթե խոսքը երեխաների անվտանգությանն է վերաբերում, մի ելք կգտնեն»,- ասում է Էջմիածնի թիվ 2 դպրոցի տնօրեն Սուսաննա Նազարյանը: Այս դպրոցն այնպիսի խայտառակ վիճակում է գտնվում, որ յուրաքանչյուր օր կարող է մի սարսափելի աղետ պատահել: Ավելի մանրամասն՝ «Առավոտի» հաջորդ համարում:

Մայրենիի oր

Հայո՛ց լեզու

Հայոց լեզու, դու՝ Մաշտոցիս կրակ անմար,

Դու՝ զմրուխտե անգին գոհար,

Իմ փառապանծ, իմ պերճախոս

Դու հայ լեզու:

Մասիսի պես՝ դու ալեհեր,

Նարեկիս պես՝ դու սրբազան,

Ծիրանիս պես՝ դու քաղցրահամ:

Հայո՛ց լեզու, դու Սեւակիս՝ Զանգակատուն,

Դո՛ւ Շիրազիս՝ Բիբլիական,

Մեր պապերի խոսքն ու բառն ես,

Գուսանների երգն ու տաղն ես

Եվ ապագա սերունդների այրվող ջահն ես:

ԼԻԼԻԹ ՔԵՌՅԱՆ

13 տարեկան, Չեխովի անվան դպրոց