Երեկ Սոֆիայում մեկնարկեց շախմատի աշխարհի թագի հավակնորդներ բուլղարացի Վեսելին Տոպալովի եւ ամերիկացի
Գատա Կամսկու միջեւ մրցաշարը:
Բացման պաշտոնական արարողության ժամանակ կատարված վիճակահանությունով առաջին պարտիայում սպիտակ խաղաքարերը բաժին հասան «դաշտի տիրոջը»՝ Տոպալովին: Անկասկած, սկանդալային բնավորությամբ առանձնացող այս երկու գրոսմայստերների միջեւ խաղատախտակի առջեւ ծավալվելիք պայքարի բոլոր մանրամասները կլինեն մրցաշարը լուսաբանող լրատվամիջոցների ուշադրության կենտրոնում: Սակայն այսօր մենք նպատակահարմար ենք գտնում անդրադառնալ նախօրեին Սոֆիայի շախմատային կյանքում ստեղծված ընդհանուր մթնոլորտին, որի գլխավոր գործող անձինք ոչ այնքան գրոսմայստերներն են, որքան նրանց մենեջերները:
Տոպալովի մենեջեր Սիլվիո Դանաիլովը, որքան էլ անսպասելի եւ տարօրինակ է, իրեն համեմատաբար հանգիստ է պահում: Նա անգամ «CessPro»-ի հատուկ թղթակից Յուրի Վասիլեւի «սադրիչ» հարցերին պատասխանել է հավասարակշռված: Որքան էլ տարօրինակ, միեւնույն ժամանակ, հասկանալի է (մրցամարտն անցկացվում է Բուլղարիայում)՝ Դանաիլովն անգամ լրագրողների հետ զրուցելու (այլ ոչ թե կռվելու կամ ինչ-ինչ հարցերում քննադատել-մեղադրելու) ժամանակ ունի: Նա ընդհանուր առմամբ գոհ է իր հովանավորյալի եւ Կամսկու միջեւ կայանալիք մրցամարտի համար ստեղծված պայմաններից:
Իսկ ահա Գատա Կամսկու մենեջեր Էմիլ Սուտովսկին, դեռ մինչեւ մրցամարտի ժամացույցն աշխատեցնելը, լուրջ դիտողություններ է ներկայացրել կազմակերպիչներին, որոնք լուծելու գործընթացին ի պաշտոնե մասնակից են դարձել Հայաստանի ներկայացուցիչներ, մրցավար Աշոտ Վարդապետյանը եւ բողոքարկման հանձնաժողովի անդամ Վանիկ Զաքարյանը:
Սուտովսկու դժգոհությունը հիմնականում կապված է եղել լուսավորության հետ: Նրա պնդմամբ՝ կիսախավարն ապահովված չի եղել, ինչը կարող է ազդել գրոսմայստերների, հատկապես՝ իր հովանավորյալ Կամսկու մրցելույթի վրա: Նույն «CessPro»-ի վկայությամբ՝ Սուտովսկու, Դանաիլովի, մրցավարների եւ մյուս պատասխանատուների մասնակցությամբ համատեղ խմբի ստուգումից հետո կողմերը խնդրի լուծման՝ երկու կողմերի համար ընդունելի տարբերակ են գտել:
Երեկ առաջին տուրն ավարտվեց ոչ-ոքի: Չնայած Տոպալովի՝ իր թիմի եւ համակարգային ծրագրի՝ «տանը» նախապատրաստած խնդիրներին, Կամսկին հաջող դիմակայեց դրանց:
Առաջին տուրից հետո Տոպալով-Կամսկի մրցամարտի հաշիվը կեսական միավոր է:
