Գրողների միությունը ցանկանում է գիրք նվիրելու ավանդույթ ստեղծել, իսկ հրատարակիչները դժգոհում են հարկերից
![\"\"](\"https://www.aravot.am/2009/aravot_arm/February/18/p8.jpg\")
Մ. Բարսեղյանը (ձախից), Ա. Մարտիրոսյանը եւ Մ. Կարապետյանը:
Փետրվարի 19-ը առաջին անգամ հայտարարված է միմյանց գիրք նվիրելու օր: Ոմանք իրար առանձնատներ ու ավտոմեքենաներ, մեծ հարստություններ են նվիրում, իսկ ահա Գրողների միությունն էլ ցանկանում է գիրք նվիրելու ավանդույթ ստեղծել: Ասել է թե, այլեւայլ արժեքների կողքին գիրքն էլ կա, մտավոր հարստությունն էլ կա: Այդ օրը դարձյալ առաջին անգամ Խնկո-Ապոր անվան գրադարանում կազմակերպվում է մանկական եւ կրթական գրականության ցուցահանդես-վաճառք: Միջոցառման ֆոնին ունենք մի շարք մտահոգություններ, որի առիթով զրույցի հրավիրեցինք տեղական գրահրատարակիչներից ոմանց:
Մկրտիչ Կարապետյան, «Էդիթ պրինտ» հրատարակչության տնօրեն. «Ինչ խոսք, հարցեր կան, որոնք սպասում են իրենց լուծմանը: Հիշեցնենք, որ նախկինում հանրապետությունում գործում էր շուրջ 500 գրախանութ, այսօր դրանց թիվը 10 է: Նշեմ նաեւ, որ մաքուր գրախանութներ՝ զուտ գրքեր վաճառող, պարզապես չկան: Խաթարված է նաեւ ընթերցող-հրատարակիչ կապը»:
Միհրան Բարսեղյան, «Մակմիլան Արմենիա» հրատարակչության տնօրեն. «Համակարծիք չեմ, որ դասագրքերն իրենց պոլիգրաֆիական եւ բովանդակային որակներով զիջում են մանկական գրականությանը: Երկու «մասով» էլ մենք աշխատում ենք ապահովել հնարավորինս բարձր որակ: Արդեն գոյություն ունի դպրոց-հրատարակչություն կապ, եւ դպրոցն է որոշում, թե որ հրատարակչության արտադրանքը ընտրի: Համաշխարհային բանկը ԿԳ նախարարության հետ ստեղծել է կառույց, որի կողմից ստուգվում են դասագրքերի տեխնիկական որակները, եւ եթե այն բավարար չէ, հրատարակչությունը կա՛մ տուգանվում է, կա՛մ իր հաշվին է «խոտանը» վերատպագրում»:
Արմեն Մարտիրոսյան, «Անտարես» մեդիա հոլդինգի նախագահ. «Կոլեգաներս կհաստատեն այն միտքը, որ համաշխարհային մանկական գրականության լավագույն ստեղծագործությունները մայրենի լեզվով տպագրելու առիթով ունենք մեծ ծրագրեր: Կոնկրետ՝ հայերենով արդեն վաճառքում են Շեքսպիրի «Համլետը», «Ռոմեո եւ Ջուլիետը», Հեմինգուեյի «Ծերունին եւ ծովը»: Հայ մանկագիրներից էլ Յուրի Սահակյանի, Երվանդ Պետրոսյանի եւ մյուսների գրքերը: Կուզեի խոսել մի պրոբլեմի մասին: Հայաստանում մանկական եւ կրթական գրքերը ազատված են ԱԱՀ-ից: Միակ ժանրը գրականության ոլորտում, որ ազատված չէ այդ հարկից՝ գեղարվեստականն է: Եվ սա պատճառներից մեկն է, որ պատշաճ մակարդակի գեղարվեստական գրականություն մեզ մոտ չի հրատարակվում: Օրեր առաջ վարչապետը հայտարարեց, որ ձեռագործ գորգերի արտադրությունը՝ որպես ժողովրդական ստեղծագործություն, կազատվի ԱԱՀ-ից եւ շահութահարկերից: Ուզում եմ հարցնել՝ հարգելի վարչապետ, գի՞րքն է, որ ո՛չ ժողովրդական է եւ ո՛չ էլ ստեղծագործություն»:
