Հայ գրոսմայստերները հավակնում են
![\"\"](\"https://www.aravot.am/2009/aravot_arm/February/11/p13.jpg\")
«CessPro» ինտերնետային կայքը տեղեկացնում է, որ շախմատի հեղինակավոր մասնագետներն ընտրել են անցած տարվա ընթացքում խաղացված հազարավոր պարտիաներից քառասունը, որոնցից փորձագետների քվեարկությամբ որոշվելու է մեկը, որը կճանաչվի որպես մրցաշրջան 2008-ի ամենահիասքանչ ստեղծագործական նվաճում: Ուրախալի է, որ այդ անվանակարգին հավակնում են նաեւ տարբեր մրցաշարերում Հայաստանի ներկայացուցիչների խաղացած պարտիաները: Դրանք են.
Լեւոն Արոնյան-Լյուկ վան Վելի՝ 1:0, «Corus» մրցաշար:
Վիշվանաթան Անանդ-Լեւոն Արոնյան՝ 0:1, «Մորելիա/Լինարես»:
Լեւոն Արոնյան-Անդրեյ Վոլոկիտին՝ 1:0, «Եվրոպայի ակումբային առաջնություն», Կալիտեա:
Վլադիմիր Հակոբյան-Վեկոսլավ Ժիվկովիչ՝ 1:0, «Եվրոպայի ակումբային առաջնություն», Կալիտեա:
Գաբրիել Սարգսյան-Ալեքսանդր Գրիշչուկ՝ 1:0, «Շախմատի համաշխարհային օլիմպիադա», Դրեզդեն:
Վլադիմիր Հակոբյան-Մաքսիմ Վաշյե-Լագրավ՝ 1:0, «Շախմատի համաշխարհային օլիմպիադա», Դրեզդեն:
Տոպալով-Կամսկի 9-րդ դիմակայությունը
Փետրվարի 16-28-ը Սոֆիայում ՖԻԴԵ-ի վարկանիշային դասակարգման 1-ին հորիզոնականն ![\"\"](\"https://www.aravot.am/2009/aravot_arm/February/11/p5.jpg\")
զբաղեցնող բուլղարացի գրոսմայստեր Վեսելին Տոպալովը եւ 2007 թվականի աշխարհի գավաթակիր՝ ամերիկացի գրոսմայստեր Գատա Կամսկին ութ պարտիայից բաղկացած մրցամարտ են անցկացնելու միմյանց միջեւ, որի հաղթողն իրավունք է ստանալու այնուհետեւ աշխարհի թագի համար պայքարել գործող չեմպիոն, հնդիկ գրոսմայստեր Վիշվանաթան Անանդի հետ: Ըստ մրցակարգի, հիմնական մրցաշարում հավասար միավորներ արձանագրվելու դեպքում փետրվարի 28-ին նրանց միջեւ կկազմակերպվի 25 րոպեանոց չորս պարտիայից բաղկացած թայ բրեք: Եթե այստեղ էլ հաղթողը չորոշվի, կանցկացվի եւս երկու պարտիա, յուրաքանչյուրը 5 րոպե տեւողությամբ: Եվ եթե ուժերը կրկին հավասար լինեն, կկայանա վճռորոշ հանդիպումը, որում հաղթելու համար սպիտակներին կհատկացվի 6 րոպե, իսկ սեւերին՝ 5: Ոչ-ոքիի դեպքում առավելությունը կտրվի սեւերին:
![\"\"](\"https://www.aravot.am/2009/aravot_arm/February/11/p11.jpg\")
Մինչ այդ Տոպալովն ու Կամսկին խաղատախտակի առջեւ միմյանց հետ հանդիպել են ութ անգամ: Բացահայտ առավելություն ունի բուլղարացին: Նա հաղթել է չորս անգամ եւ գրանցել նույնքան ոչ-ոքի՝ ընդհանուր առմամբ վաստակելով 6,0 միավոր: Կամսկին դեռ չի ճաշակել հաղթանակի բերկրանքը եւ իր հաշվարկում ունի 2,0 միավոր:
Տոպալով-Կամսկի պատասխանատու դիմակայության երեք մրցավարներից մեկը հայաստանցի միջազգային կարգի մրցավար Աշոտ Վարդապետյանն է: Իսկ մեր Վանիկ Զաքարյանն ընդգրկված է բողոքարկող հանձնաժողովում:
