Պերճ Քարազյանը՝ Պրոկոֆեւի «Երեք նարինջների սերը» օպերայում
![\"\"](\"https://www.aravot.am/2009/aravot_arm/February/11/p18.jpg\")
Պերճ Քարազյանն իր «նարինջների» հետ:
Բազմադարյա մշակույթ ունեցող մեր երկիրը դեռ հայտնի չէ ողջ աշխարհին՝ իր գեղագիտական կուտակումներով եւ ձեռքբերումներով: Շոտլանդիայում, օրինակ, մինչեւ այս տարի որեւէ տեղեկություն չունեին հայկական վոկալ դպրոցի եւ մեր օպերային արվեստի մասին: Արդեն իսկ հաճելի է, որ շնորհիվ Երեւանի Կոմիտասի անվան պետական կոնսերվատորիայի եւ Շոտլանդիայի թագավորական ակադեմիայի նախաձեռնության, միայն այս տարի այդ հեռավոր երկրում, որի թե՛ բանաստեղծական, թե՛ երաժշտական արվեստների մասին մենք, այնուհանդերձ, պատկերացումներ ունենք, ծանոթանում են մեր վոկալ դպրոցին, ձեւավորում պատկերացումներ ու ստեղծագործական համագործակցություն: Հունվարի 23-24-ին՝ Գլազգոյի թագավորական, 28-31-ին էլ՝ Էդինբուրգի «Ֆեստիվալ» թատրոններում կայացավ վերջին 20 տարվա ընթացքում ԽՍՀՄ-ում չբեմադրված, իսկ աշխարհում հազվադեպ ներկայացված Պրոկոֆեւի «Երեք նարինջների սերը» օպերայի պրեմիերան: Գլխավոր՝ արքայազնի դերերգով հանդես է եկել օպերային երգիչ Պերճ Քարազյանը:
«Առավոտի» հետ զրույցում երիտասարդ երգիչը հայտնեց, որ դեռեւս 2008թ. աշնանը Շոտլանդիայի թագավորական ակադեմիայի ներկայացուցիչները Երեւանի կոնսերվատորիայի հրավերով գտնվել են Հայաստանում եւ ունկնդրել Ղ. Սարյանի անվան օպերային ստուդիայի տղամարդ երգիչներին: «Դերերգի համար ընտրեցին ինձ: «Երեք նարինջների սերը», փաստորեն, ուսանողական ներկայացում էր, օրինակ, ներկայացման մեջ հրավիրված էր նաեւ Ռոստովի կոնսերվատորիայի ուսանող, հիանալի բաս Յուրի Օլյոխինը: Ի դեպ, թագավորական ակադեմիան Ռոստովի պետական կոնսերվատորիայի հետ տարիների համագործակցության փորձ ունի: Ինձ համար անասելի պատասխանատու էր, քանի որ շոտլանդացիները հայ վոկալ դպրոցի մասին պետք է պատկերացում կազմեին ինձանով: Ուրախալի է, որ հայրենիք ժամանելուց առաջ ակադեմիայի օպերային դպրոցի տնօրեն Թիմոթի Դիինը, որը ներկայացման դիրիժորն էր, եւ բեմադրիչ Լի Բարքլին ցանկություն հայտնեցին դարձյալ ժամանել Հայաստան, իրենց խոսքերով՝ «ստեղծագործական ավելի լուրջ կապեր հաստատելու համար»,- ասում է Պ. Քարազյանը:
Հետաքրքրվեցինք նաեւ Շոտլանդիայում օպերային արվեստի ոլորտով: Պ. Քարազյանը նշեց, որ Շոտլանդիայի թատրոններն ունեն միայն երգչախումբ ու նվագախումբ, իսկ մեներգիչներին նրանք ընտրում են մրցույթների, լսումների եւ, բնականաբար, իմպրեսարիոների միջոցով: Հարցին, թե իրեն ոչ մի առաջարկ չեղա՞վ, հայ երգիչը, նախ նշելով շոտլանդացիների՝ օպերային արվեստով հետաքրքրվողների մեծ բանակը եւ օպերային թատրոնում աշխատող դիրիժորից, բեմադրիչից մինչեւ բեմի աշխատակիցների ու լուսավորողների անկաշկանդ ազատությունն ու միմյանց հանդեպ բարյացակամ վերաբերմունքը, ասաց. «Հրավիրվեցի Լոնդոն, որտեղ «Քովեն Գարդեն» օպերայում կայացավ ունկնդրում, արդյունքների մասին ինձ կհայտնեն փոքր-ինչ ուշ»:
