Վստահ է ՀՀԿ խորհրդի անդամ, ԱԺ պատգամավոր Լեռնիկ Ալեքսանյանը
– Ձեր գործընկեր ազատազրկված պատգամավորները բաց նամակով դիմել էին ԱԺ նախագահին՝ իրենց հարցով արտահերթ նիստ անելու եւ ՀՀ գլխավոր դատախազին հրավիրելու պահանջով: Այս մասին Դուք ի՞նչ եք մտածում:
– Անձեռնմխելիության հարցը ժամանակին քննարկվել է, չեմ կարծում, որ այսօր ԱԺ-ն նորից պիտի անդրադառնա այդ հարցին: Անձեռնմխելիությունից զրկել են նրա համար, որ դատական գործընթաց լինի, ավարտվի եւ պարզ լինի՝ մարդիկ մեղավո՞ր են, թե՞ ոչ: Ինչքան էլ ասենք՝ դատական համակարգը լավը չէ, դատական պրոցեսի ավարտից հետո միայն ճիշտ գնահատական կարելի է տալ:
– Սակայն դատական պրոցեսը չի էլ սկսվում, որ ավարտվի:
– Սա ուրիշ խնդիր է, բայց առանց դրա ավարտի նորից ԱԺ-ում քննարկելը… ի՞նչը քննարկել, ի՞նչ որոշում ընդունել։ Ես՝ որպես ընկեր, գործընկեր, կողմնակից եմ, որ դատական պրոցեսը ճիշտ ավարտվի, մեղավորներ չլինեն, որովհետեւ իրենք մեր ընկերներն են, բայց դատական պրոցեսի ավարտից հետո միայն կարելի է նոր պրոցեսներ սկսել:
– Այսինքն՝ Դուք ստորագրահավաքին չեք մասնակցի:
– Ես կուսակցական եմ: Դա լուրջ հարց է, ես չեմ կարող հաշվի չառնել կուսակցական որոշումները: Ի՞նչ պիտի քննարկի ԱԺ-ն, ես համարում եմ, որ դա էժան պոպուլիզմ է, պոպուլիզմ էլ չասեմ, գուցե անկեղծ ցանկություն է, բայց ժամանակին չի. դա կամ պիտի առաջ արվեր, կամ՝ դատական պրոցեսից հետո:
– Համարո՞ւմ եք, որ մարտի 1-ի գործով անցնողները քաղբանտարկյալներ են:
– Նախ, պետք է որոշակիացնել, թե ինչ է նշանակում քաղբանտարկյալ։ Իմ կարծիքով՝ քաղբանտարկյալները գաղափարական հենքի վրա մարդիկ են, որոնք ունեն իրենց սկզբունքային գաղափարները: Մեր տղաները պատգամավոր են դարձել կուսակցության պաշտպանությամբ, համենայնդեպս, Մալխասյան Մյասնիկը 25-րդ համարն է եղել, Սասունը եւս կուսակցության ցուցակով է անցել, եւ եթե կուսակցության անդամ են եւ կուսակցության ցուցակով են պատգամավոր դարձել, չեմ կարծում, որ գաղափարական տարաձայնություններ են ունեցել այս կուսակցության հետ: Իրենց հայացքների համար քաղբանտարկյալ իրենք չեն կարող կոչվել, իսկ մարդկային հարաբերությունները ես չեմ համարում քաղաքականություն: Տեսականորեն իրենք քաղբանտարկյալներ չեն:
– Արդեն շուրջ 10 ամիս ՀՀԿ նախագահը նաեւ հանրապետության նախագահն է: Ինչպե՞ս եք գնահատում նրա նախագահական գործունեությունը:
– Ես անկեղծորեն հավատում եմ, որ հանրապետության նախագահը մեծ ցանկություն եւ հետեւողականություն է դրսեւորում իր նախընտրական ծրագրերը իրականացնելու համար, ես դա տեսնում եւ հավատում եմ։ Քաղաքականությունը պետք է գնահատել ժամանակի մեջ: Ես նախագահի գործունեությունը դրական եմ գնահատում այն առումով, որ նա հետեւողականորեն փորձում է խնդիրները լուծել:
– Ըստ որոշ պնդումների՝ Ռ. Քոչարյանի կոշտ եւ անհանդուրժող կառավարումը մեր իրականության համար ավելի ճիշտ է, քան ավելի հանդարտ քաղաքականությունը, համաձա՞յն եք:
– Քաղաքական գործչի կողմից ամեն ինչին ուղղակի արձագանքելը ճիշտ չէ, քաղաքական գործիչը պիտի լինի հանդուրժող՝ տան մեծի նման, այնպիսին, ինչպիսին հանրապետության նախագահն է, եւ պետք է ի վիճակի լինի ճիշտ գնահատել իրավիճակը, առանց էմոցիաների. ես այսպիսին եմ պատկերացնում ճիշտ քաղաքական գործչին: Ճիշտը Սերժ Սարգսյանի այսօրվա քաղաքականությունն է, հատկապես հանդուրժողականությունը: Իմ կարծիքով՝ այսօր ինքն ավելի հանդուրժող է, քան՝ պաշտպանության նախարար, քան վարչապետ եղած ժամանակներում: Ես չեմ համարում, որ ինքը մեղմ է, ինքն իր պաշտոնին համապատասխան բնավորություն է դրսեւորում, եւ դա իր ճիշտ քաղաքականությունն է:
– Ինչպե՞ս եք գնահատում ընդդիմության գործունեությունն այս պահին:
– Թուրքիայի հանդեպ դիրքորոշումն ինձ դուր եկավ, որովհետեւ, ի վերջո, այդ քաղաքականությունը մոտ է ժամանակին Լ. Տեր-Պետրոսյանի վարած քաղաքականությանը։ ՀԱԿ-ում գաղափարախոսությունը բազմազան է, բայց կա մի հիմնական բան, որը Լ. Տեր-Պետրոսյանն առաջ է տանում. դա ժողովրդավարությունն է, ավելի քիչ ազգայնականությունը (ինքս էլ կողմնակիցը չեմ չափից դուրս ազգայնականությանը), եւ այսօր Սերժ Սարգսյանն էլ, ՀՀԿ-ն էլ ավելի քիչ դոզայով ազգայնական քաղաքականություն են վարում, դրա ապացույցը Թուրքիայի հետ հարաբերություններն են: Իսկ արտաքին քաղաքականության հարցում իշխանությունը եւ ընդդիմությունը թշնամիներ չեն, ընդդիմությունն էլ այնպիսի բան պիտի ասի, որը Հայաստանին չվնասի։ Այդ առումով, կարծում եմ, ԵԽ-ում վերջին շրջանում ընդդիմության կողմից հնչեցված արտահայտությունները ճիշտ չէին:
– Ազատության մեջ ինչո՞վ է զբաղվում Արմեն Զավենի Սարգսյանը։
– Զբաղվում է իր առողջական խնդիրներով, մեկնել էր բուժման, զբաղվում է իր գործերով՝ քաղաքականությունից հեռու:
