![\"\"](\"https://www.aravot.am/2009/aravot_arm/February/5/p18.jpg\")
«Regnum» գործակալությունը, վկայակոչելով ըմբշամարտի եվրոպական կոմիտեի փոխնախագահ Գեորգի Բրյուսովի՝ ռուսաստանյան լրատվամիջոցներին արած հայտարարությունը, տեղեկացնում է, որ սիրողական ըմբշամարտի միջազգային ֆեդերացիայի ղեկավար բարձրագույն մարմինն օրերս Հռոմում կայացած նիստում հունահռոմեական ըմբշամարտի կանոններում փոփոխություններ է կատարել:
Գ. Բրյուսովը տեղեկացրել է, որ այդ փոփոխությունները կատարվել են նաեւ ՄՕԿ-ի գործադրած ջանքերի շնորհիվ: Ու թեեւ, ըստ սահմանված կարգի, այդ իրավունքը վերապահված է ՖԻԼԱ-ի համաժողովին, իսկ բարձրագույն մարմինը լիազորված է ընդամենն առանձին ուղղումներ կատարել, փոխզիջումային տարբերակ, այնուամենայնիվ, գտնվել է: Ըստ այդմ, որոշվել է ապրիլին Վիլնյուսում մեկնարկող Եվրոպայի առաջնությունն անցկացնել նոր օրենքներով, որոնց մեջ կարեւորագույններն են. ամբողջովին բացառվում է վիճակահանությունը, մարտը բաղկացած է երկու րոպե տեւողությամբ երեք մրցափուլից, ըմբիշները կանգնած դիրքում գոտեմարտում են ոչ թե մեկ, այլ մեկուկես րոպե:
Եթե առաջին մրցափուլում արդյունավետ հնարք չի կատարվում, չորեքթաթ դրություն ընդունում է պայմանական «կարմիր» մարզահագուստով ըմբիշը: Երկրորդ մրցափուլում նույնը կրկնվելու դեպքում տեղերը փոխվում են: Իսկ եթե մարտի ավարտին հաղթողն ի հայտ չի գալիս, նախապատվությունը տրվում է ընդհանուր հաշվարկով այդ պահին առավելություն ունեցող մարզիկին: Գեորգի Բրյուսովը հավելել է նաեւ, որ, հնարավոր է, ապագայում կոսմետիկ որոշ փոփոխություններ կատարվեն:
«Առավոտը» երեկ փորձեց կատարված փոփոխությունների հավաստիության եւ անհրաժեշտության մասին պարզաբանումներ ստանալ հունահռոմեական ըմբշամարտի Հայաստանի ազգային հավաքականի գլխավոր մարզիչ Լեւոն Ջուլֆալակյանից: «Որ մեր մարզաձեւի կանոններում պարտադիր ինչ-ինչ փոփոխություններ կատարելու անհրաժեշտություն կար, միայն ես չէ, որ համոզված եմ: Այդ մասին բազմիցս խոսել են գրեթե բոլոր երկրների մասնագետները,- ասաց նա:- Սպասվելիք փոփոխությունների մասին մենք գիտեինք, բայց ՖԻԼԱ-ից որեւէ փոփոխության մասին պաշտոնապես որեւէ ծանուցում կամ հաստատում՝ մեր ֆեդերացիան չի ստացել: Եղել է առաջարկների ընդամենը մի քանի տարբերակ, բայց կոնկրետ հանձնարարականներ՝ ոչ: Մասնավորապես, որ կանգնած դիրքում ըմբիշներին պայքարելու հնարավորություն կարող է տրվել երկու րոպե: Եթե կրկին հնարք չգրանցվեց, նրանց կհատկացվի եւս կես րոպե: Դրանից հետո մարզիկներից մեկը կմոտենա պարկին եւ ինքը վիճակահանություն կկատարի: Խոսակցություն կա, որ ըմբշամարտում ընդունված «պարտեր» տերմինի ժամանակ վերեւից աշխատող մարզիկը պետք է աշխատանքն սկսի սովորականի պես՝ ձեռքերը մրցակցի մեջքին հպած դիրքից, այլ ոչ թե հակառակ բռնվածքով: Ես դրան միանշանակ կողմ եմ, որովհետեւ այդ դեպքում հնարավոր խարդախությունները նվազագույնի են հասցվում, եթե չասենք՝ բացառվում են: Չգիտեմ, թե ռուսաստանյան լրատվամիջոցներում ի՞նչ են գրել, կրկնում եմ, որ եթե նման որոշումներ արդեն կայացված լինեին, մենք դրանց պաշտոնապես արդեն տեղեկացված պետք է լինեինք: Հնարավոր է, որ քննարկումներ, անգամ պայմանավորվածություններ ձեռք բերվել են: Բայց այդ ամենը պետք է հաստատվի ՖԻԼԱ-ի համաժողովում: Եկեք մի քիչ էլ սպասենք»:
