![\"\"](\"https://www.aravot.am/2009/aravot_arm/February/4/p6.jpg\")
Հովիկ Հայրապետյանի անվան ձիասպորտի կենտրոնում կայացավ մարզաձեւի հանրապետական ֆեդերացիայի համաժողովը
Օրակարգային հարցերից մեզ ավելի շատ հետաքրքիր էր «Մրցաշրջան 2009»-ի ժամանակացույցի ձեւավորումը: Ֆեդերացիայի նախագահ Հայրապետ Հայրապետյանն ասաց. «Տարին ծանր է լինելու, այդ թվում նաեւ մրցումների կազմակերպման առումով: Սակայն, ինչպես խոսք ենք տվել, բոլոր 17 պաշտոնական մրցումներն էլ ոչ միայն կայանալու են, այլեւ դրանց թիվն ավելանալու միտում ունի: Դրանց կանդրադառնանք քիչ հետո: Ֆեդերացիան որոշել է այս տարի որոշակիորեն փոխել իր քաղաքականությունը՝ մրցումները, որքան հնարավոր է, ձիասպորտի կենտրոնից տեղափոխել ակումբներ, ինչը կնպաստի վերջինների զարգացմանը: Մասնավորապես, նախնական համաձայնություն ունենք «Արա եւ Այծեմնիկ» ակումբի ղեկավարության հետ, իրենց գավաթի խաղարկությունը, ձիասպորտի օլիմպիական երիտասարդական վարկանիշային մրցաշարը եւ ֆեդերացիայի գավաթն այնտեղ կազմակերպելու հարցում»:
Պարոն Հայրապետյանն առաջարկեց նաեւ, ի տարբերություն նախորդների, այս տարի ձիասպորտի մրցումների մեկնարկը տրվի ոչ թե մարտին, այլ ապրիլին: «Մարտի սկզբից սկսած՝ միմյանց հաջորդող գավաթային լուրջ խաղարկություններ ունենք,- ասաց նա:- Բայց այդ ժամանակ նժույգները դեռ պատրաստ չեն լինում մրցումներին: Եթե այս հարցում ձիասպորտի կենտրոնը խնդիրներ գրեթե չունի (այստեղ կենդանիները ձմռանն էլ են աշխատում), ակումբներից շատերը պայմաններ չունենալու պատճառով խնդիրներ են ունենում: Իսկ որպեսզի մարտ ամիսը հենց այնպես չանցնի, առաջարկություն կա ակումբների միջեւ կազմակերպել նոր, այսպես կոչված, նախնական փուլի փորձնական մրցումներ: Սրանով կհամալրվի օրացույցը, նժույգներն էլ պաշտոնական մրցումներին կներկայանան արդեն պատրաստի վիճակում: Բացի դա, քանի որ ակումբներում արդեն ձեւավորվել է ոչ պրոֆեսիոնալ նժույգավարների բանակ, նպատակահարմար եմ համարում սեպտեմբերին ֆեդերացիայի հովանու ներքո նրանց համար մեկ առանձին մրցում եւս կազմակերպել»:
«Արա եւ Այծեմնիկ» ակումբի նախագահ Նազիկ Ամիրյանը տեղերում համապատասխան պայմաններ չունեցող իր գործընկերներին իրենց ակումբի տարածքը տրամադրելու պատրաստակամություն հայտնեց, որպեսզի վերջինները կարողանան անցկացնել իրենց ակումբային առաջնությունները:
Անդրադառնալով կազմակերպչական խնդիրներին՝ Հայրապետ Հայրապետյանը նշեց, որ հունվար ամիսն արդեն ավարտվում է, բայց դեռ ոչ մի ակումբ ֆեդերացիայում չի գրանցվել: Նրա առաջարկով սահմանվեց գրանցման վերջնաժամկետ՝ մինչեւ փետրվարի 10-ը:
Համաժողովի ավարտին ընտրվեց ֆեդերացիայի նոր ղեկավար կազմ:
