Անսահմանափակ եթերաժամ
Կառավարությունն այլեւս «տաբու» չի դնի ազգային փոքրամասնությունների եթերաժամին
Կառավարությունը, ի դեմս ազգային փոքրամասնությունների եւ կրոնի հարցերի վարչության, վերջերս Ազգային ժողովում հանդես է եկել «Հեռուստատեսության եւ ռադիոյի մասին ՀՀ օրենքում» ազգային փոքրամասնություններին վերաբերող մի քանի կետերում փոփոխություններ մտցնելու առաջարկով: «Առաջարկությունը հետեւյալն է՝ «Հայաստանի հեռուստատեսության եւ ռադիոյի մասին» օրենքի՝ ազգային փոքրամասնությունների մասին հոդվածում առկա եթերաժամանակի սահմանափակումը վերացնել»,- երեկ «Հայելի» ակումբում հրավիրված ասուլիսի ժամանակ ասաց Հայաստանի կառավարության աշխատակազմի՝ ազգային փոքրամասնությունների եւ կրոնի հարցերի վարչության պետ Վարդան Ասցատրյանը: Նրա խոսքով՝ «Հայաստանը, բացի իր սահմանադրությամբ սահմանված դրույթների, որոնք նախատեսում են ազգային փոքրամասնությունների իրավունքների պաշտպանությունն ու զարգացումը, մասնավորապես՝ կրթամշակութային ոլորտի, միացել է նաեւ եվրոպական մի շարք կոնվենցիաների, որոնք ապահովում են մեր երկրի մուտքը եվրոպական ընտանիք: Այդ կոնվենցիաներից չորսն ուղղակիորեն եւ անուղղակիորեն վերաբերում են մարդու իրավունքներին եւ ազգային փոքրամասնություններին: Դրանց շրջանակներում Հայաստանը նաեւ պարտավորություն է ստանձնել՝ մասնավորապես հեռուստատեսության եւ ռադիոյի ոլորտում ազգային փոքրամասնությունների հնարավորությունների շրջանակների ընդլայնման առումով: Ըստ օրենքի՝ Հանրային հեռուստաընկերությունը կարող է եթերային ժամանակ տրամադրել ՀՀ ազգային փոքրամասնությունների լեզուներով հատուկ ծրագրերի եւ հաղորդումների հեռարձակման համար: Նման հաղորդումների ընդհանուր ժամաքանակը չպետք է գերազանցի հեռուստատեսությամբ՝ շաբաթական մինչեւ 1, ռադիոյով՝ օրական մինչեւ 1 ժամը, ինչը կառավարությունը առաջարկում է պարզապես օրենքից հանել»:
Հայաստանի ազգային փոքրամասնությունների մշակութային կենտրոնի համակարգող խորհրդի նախագահ Ռազմիկ Խոսրոեւն էլ նշեց. «Նախկինում մեզ տրամադրված շաբաթական մեկ եթերաժամը բաժանվում էր ՀՀ-ում առկա 11 ազգային փոքրամասնությունների վրա, որը ծիծաղելի վայրկյաններ էր կազմում: Հույս ունեմ, որ օրենքի այս փոփոխությունը կազատի մեզ այդ խնդրից»:
ԼՈՒՍԻՆԵ ՇԱՀԲԱԶՅԱՆ
