Մահվան դատավճիռներ՝ կաթի կեղծարարներին
Չինաստանում երկու հոգի դատապարտվել է մահվան եւ եւս 2 հոգի՝ ցմահ բանտարկության՝ կաթի մեջ «մելամին» կոչվող տոքսիկ նյութի ավելացման համար: Մելամինը խառնում էին կաթի մեջ՝ արտադրանքն ավելի սննդարար դարձնելու համար: Չինաստանի արեւելքում անօրինական գործարանի արտադրած այդ փոշին գնում էին կաթի շատ արտադրողներ: Արդյունքում՝ 3 երեխա մահացավ, ու եւս 300 հազարը ստացավ սննդային թունավորում (լուսանկարում): Մեղադրանքներ են առաջադրվել մի շարք գործարարների եւ պաշտոնյաների: Մելամինով թունավորված կաթնամթերք վաճառվում էր նաեւ Ռուսաստանի որոշ շրջաններում:
Տարվա սկիզբը Իրանում նույնպես նշանավորվեց բազմաթիվ մահապատիժներով: Ըստ «Մոսկովսկի կոմսոմոլեց» թերթի, միայն վերջին օրերին կախաղան է հանվել 24 հոգի, որից 10-ը՝ սպանության համար: Ընդհանրապես, անցած տարվա ընթացքում Իրանում մահապատժի է ենթարկվել 226 հանցագործ: Ըստ Իրանի օրենսդրության, մահապատժի պատճառ կարող են դառնալ սպանությունը, բռնաբարությունը, զինված կողոպուտը, թմրադեղերի առեւտուրը, ինչպես նաեւ՝ ամուսնական դավաճանությունը:
