Հնարավոր է՝ կապված համաշխարհային ճգնաժամի հետ, դրսում աշխատանք փնտրողների արտահոսքը նվազի: Երեկ լրագրողներին ասաց ՀՀ տարածքային կառավարման նախարարության միգրացիոն գործակալության պետ Գագիկ Եգանյանը: Նրա ներկայացմամբ՝ «Համաշխարհային ճգնաժամը հիմնականում ազդել է ֆինանսական եւ շինարարական շուկայի վրա: Այսինքն՝ եթե այդ նպատակով արտագնա աշխատանքի էին մեկնում գարնանը, այդ մեկնողները գուցե եւ չգնան, քանի որ մեր հայրենակիցները հիմնականում աշխատում են շինարարության ոլորտում: Չնայած՝ այս առումով հստակ տվյալներ կարող ենք հրապարակել որոշ ժամանակ անց»: Ըստ պարոն Եգանյանի՝ պաշտոնական տվյալներով տարեկան մեր երկրից ՌԴ արտագնա աշխատանքի է մեկնում մոտ 60 հազար մարդ:
Գործակալության պետի խոսքերով՝ ճգնաժամի հետեւանքով Ռուսաստանը ԱՊՀ երկրների համար սահմանած նախկին՝ 3,9 միլիոն միգրացիոն քվոտան կրճատել է 2 անգամ, ինչի հետեւանքով համեմատաբար քիչ հայեր որպես միգրանտ կկարողանան մեկնել Ռուսաստան: Պարոն Եգանյանը տեղեկացրեց նաեւ, որ միգրացիան կանոնակարգող օրենսդրությունում Ռուսաստանը որոշակի փոփոխություն է կատարել, որն ուժի մեջ կմտնի հաջորդ տարի: Ըստ այդ փոփոխության՝ աշխատելու նպատակով Ռուսաստան մեկնելիս պետք է միգրացիոն քարտում այդ մասին նշում անել, հակառակ դեպքում՝ աշխատանքի ընդունվելիս խնդիրներ կլինեն:
Միգրացիոն գործակալության տվյալներով՝ Հայաստանից աշխատանքային միգրացիայի 93%-ը բաժին է ընկնում Ռուսաստանին, 4-5%-ը՝ ԱՄՆ-ին, իսկ 3-4%-ը՝ Ուկրաինային:
