![\"\"](\"https://www.aravot.am/2008/aravot_arm/December/18/p5.jpg\")
Հայաստանի ազգային անվտանգության համար սպառնալիքների հիմնական վեկտորը, ղարաբաղյան հակամարտության պատճառով, շարունակում է մնալ Ադրբեջանը: «Արմինֆոյի» թղթակցի հետ զրույցում նման կարծիք է հայտնել ՀՀ պաշտպանության, ազգային անվտանգության եւ ներքին գործերի խորհրդարանական մշտական հանձնաժողովի նախագահ, պաշտպանության նախկին փոխնախարար Արթուր Աղաբեկյանը:
«Այդ մասին են վկայում 1994 թվականին Բիշքեկում հաստատված հրադադարի ռեժիմի բազմաթիվ խախտումները,- նշել է նա:- Ցավոք, ես ադրբեջանական կողմից հրադադարի խախտումների թվի վերաբերյալ վիճակագրության չեմ տիրապետում, սակայն խախտումները պարբերական բնույթ են կրում՝ հիմնականում հրազենի կիրառմամբ: Եվ եթե Հայաստանի հետ սահմանում խախտումներ հիմնականում արձանագրվում են Նոյեմբերյանի ուղղությամբ, ապա Լեռնային Ղարաբաղի դեպքում՝ Ադրբեջանի հետ սահմանի ողջ երկայնքով»: ՀՀ պաշտպանության նախարարության տվյալներով, ընթացիկ տարում արձանագրվել է ադրբեջանական կողմից հրադադարի ռեժիմի խախտման շուրջ 3 հազար դեպք, որից շուրջ 200-ը՝ խոշոր տրամաչափի հրազենի կիրառմամբ: 2005 թվականին արձանագրվել է 273 դեպք, 2006-ին՝ շուրջ 600, 2007-ին՝ մեկուկես հազար:
Անդրադառնալով Մայնդորֆում ստորագրված Հռչակագրին՝ պաշտպանության նախկին փոխնախարարն ասել է. «Մենք չպետք է բավարարվենք Մայնդորֆում ստորագրված Հռչակագրի ներքո միայն Դմիտրի Մեդվեդեւի ստորագրությամբ: Այդ փաստաթղթի ներքո ԼՂՀ ստորագրության բացակայության պայմաններում այն անընդունելի է ինձ համար, քանի որ փաստաթուղթը չի արտացոլում Լեռնային Ղարաբաղի շահերը: Կարճ ժամանակահատվածում մեզ համար պարզ կլինի, թե արտացոլե՞լ է, արդյոք, Հռչակագիրը «ադրբեջանական հասարակությունում տիրող տրամադրությունները», թե այն դարձել է ընդամենը դեկլարատիվ փաստաթուղթ, եւ վերջինիս ստորագրումը տեղի է ունեցել Ալիեւ կրտսերի շարունակվող ագրեսիվ հայտարարությունների լույսի ներքո»:
