![\"\"](\"https://www.aravot.am/2008/aravot_arm/December/16/p1.jpg\")
Երեկ ՀՀ գլխավոր դատախազի նախկին տեղակալ Գագիկ Ջհանգիրյանը հանդես է եկել երկու հայտարարությամբ: Դրանցից մեկն ուղղված է իրեն դատող դատավոր Ժորա Վարդանյանին, մյուսը՝ ՀՀ Մարդու իրավունքների պաշտպան Արմեն Հարությունյանին: Արձանագրելով, որ արդեն քանի անգամ դատավոր Վարդանյանը կոպտորեն խախտում է իր քրեադատավարական ու սահմանադրական իրավունքները եւ առանց որեւէ լուրջ հիմնավորման մերժում է իր ու պաշտպանների միջնորդությունները, նա մի վերջին անգամ դիմել է Վարդանյանին՝ համարձակություն գտնել սահմանազատվելու մեղադրող կողմից եւ «նման դատավարությամբ հերթական անգամ չթաղել հայկական արդարադատությունը»: Գ. Ջհանգիրյանը «զարմանք ու զայրույթ» է հայտնել Օմբուդսմենի՝ «7»-ի գործի վերաբերյալ օրերս արած հայտարարության առնչությամբ: Նա կարծիք է հայտնել, որ «եթե տարին 1-2 անգամ Հայաստան այցելած օտարերկրյա պաշտոնյաների համար ակնհայտ է, որ մարտի 1-ի գործերով ՀՀ իրավապահ մարմիններն ու դատարանները քաղաքական վենդետա են իրականացնում»,
ապա՝ որպես այդ իրադարձությունների ականատես ու մասնակից, Օմբուդսմենը պարտավոր է օտարերկրացիներից շատ առաջ իշխանություններից պահանջել անհապաղ ազատ արձակել բոլոր քաղբանտարկյալներին: Ջհանգիրյանը Ա. Հարությունյանին խորհուրդ է տվել «չփշրել ժողովրդի մեջ մարդու իրավունքների պաշտպանի գրասենյակի հանդեպ ձեւավորված ընդհանուր առմամբ դրական, բայց դեռ շատ փխրուն վերաբերմունքն ու կարծիքը»:
