ԱԺ արտաքին հարաբերությունների մշտական հանձնաժողովը երեկվա նիստում քննարկել է «Ժառանգության» առաջարկը՝ Արցախյան հիմնախնդրի շուրջ խորհրդարանական լսումներ կազմակերպելու վերաբերյալ: Հիշեցնենք, որ այդ առաջարկը նոյեմբերի 19-ին պաշտոնապես ներկայացրել էր «Ժառանգություն» խմբակցության քարտուղար Ստյոպա Սաֆարյանը: ԱԺ արտաքին հարաբերությունների մշտական հանձնաժողովը երեկվա քննարկումից հետո նպատակահարմար չի համարել այս նստաշրջանում եւ նշված թեմայով լսումների կազմակերպումը: Ըստ «Ժառանգության» հաղորդագրության՝ «Հանձնաժողովի անդամների կողմից իբրեւ առաջարկի մերժման պատճառներ վկայակոչվեցին.
ա) հանձնաժողովի կողմից նախկինում այդպիսի լսումներ կազմակերպած լինելը,
բ) ղարաբաղյան խնդրով գործադիրի վարած քաղաքականությանը չխոչընդոտելու ու գործընթացին չվնասելու ցանկալիությունը,
գ) առաջիկայում խնդրին առնչվող ընթացիկ զարգացումները այլ, բայց ոչ լսումների ձեւաչափով ու կազմով քննարկելու հանձնաժողովի մտադրությունը,
դ) նախորդ գումարման ԱԺ արտաքին հարաբերությունների հանձնաժողովի կազմած թեմաների շարունակականության ապահովումը,
ե) ՀՀ նախագահի կողմից վերջերս հրավիրված քաղաքական խորհրդակցությունների բավարար լինելը,
զ) լուրջ լսումներ կազմակերպելու համար բավարար ժամանակի անհրաժեշտությունը»:
Հանձնաժողովի նախագահ Արմեն Ռուստամյանը նշել է, որ լսումները կարող են կազմակերպվել այն ժամանակ, երբ կստորագրվի կամ ստորագրվելուն մոտ կլինի որեւէ համաձայնագիր, որը պետք է ներկայացվի ԱԺ հաստատմանն ու դրվի հանրաքվեի:
