Երեւանի Ջոն Կիրակոսյանի անվան թիվ 20 դպրոցի մարզադահլիճում շարունակվում է լրատվամիջոցների թիմերի միջեւ անցկացվող «Ֆուտբոլը՝ հանուն հավասար հնարավորությունների» մինի ֆուտբոլի 2-րդ մրցաշարը:
Խմբային փուլի ավարտից հետո մասնակից ութ թիմերից պայքարը կիսաեզրափակիչում շարունակելու իրավունք ստացել էին չորսը՝ «Արեւածաղիկը», «Երկիր Մեդիան», «Tert.am»-ը եւ մրցաշարի գործող չեմպիոն «Մեդիամաքսը»:
Մրցաշարը, որի նպատակը հաշմանդամ մարդկանց համար հավասար հնարավորությունների ապահովման գաղափարի քարոզումն է, համատեղ նախաձեռնել են «Հույսի կամուրջ» հասարակական կազմակերպությունը եւ «Արեւածաղիկ» մանկապատանեկան ամսաթերթը: Իսկ այն անցկացվում է դանիական «Առաքելություն արեւելք» կազմակերպության աջակցությամբ եւ Դանիայի միջազգային զարգացման գործակալության ֆինանսական աջակցությամբ:
Կիսաեզրափակիչում «Երկիր Մեդիան» 10:7 հաշվով առավելության հասավ «Արեւածաղիկի» նկատմամբ, իսկ «Tert.am»-ը պարտության մատնեց «Մեդիամաքսին»՝ 8:2:
Այսօր հայտնի կդառնան մրցաշարի հաղթողն ու մրցանակակիրները: 3-րդ տեղի համար կպայքարեն «Արեւածաղիկն» ու «Մեդիամաքսը», իսկ «Երկիր Մեդիա»-«Tert.am» խաղում կորոշվի մրցաշարի նոր չեմպիոնը:
