Առաջադրանքն արդեն գերակատարվել է
![\"\"](\"https://www.aravot.am/2008/aravot_arm/November/15/p12.jpg\")
Լիվերպուլում ընթացող սիրողական բռնցքամարտի Եվրոպայի մեծահասակների առաջնությունը հատում է եզրագիծը: Արդեն հայտնի են եզրափակիչ հանդիպումներում ըստ քաշային կարգերի չեմպիոնական տիտղոսների հաղթողների համար պայքարողների անունները: Եվ ուրախալի է, որ նրանց մեջ են մեր հանրապետության երեք ներկայացուցիչները, որոնք 11 քաշային կարգերից երեքում պայքարում են «ոսկու» համար:
48 կգ քաշային Հովհաննես Դանիելյանը կիսաեզրափակիչում հաղթեց նաեւ ռումինացի Իշտվան Ունգվարիին (4:2) ու մտավ եզրափակիչ, որտեղ Եվրոպայի «ոսկին» վիճարկելու է Իսպանիայի ներկայացուցիչ Ժոզե դե լա Նիեվե Լինարեսի հետ:
Գերազանց է հանդես գալիս նաեւ մինչեւ 64 կգ քաշային Էդուարդ Համբարձումյանը, որը մրցավարների տված միավորների 8:1 բացարձակ տարբերությամբ պարտության մատնեց Մարչին Լեգովսկուն (Լեհաստան) եւ վճռական մենամարտում հանդիպելու է հունգարացի Գուիլա Կատեի հետ:
Եզրափակիչի մեր երրորդ մասնակիցը դարձավ հունգարացի Ջոզեֆ Դարմոսի նկատմամբ կամային պայքարում (5:4) առավելության հասած 91 կգ քաշային Ցոլակ Անանիկյանը, որին չեմպիոնական պատվանդանին կանգնելու համար արդեն պահանջվում է հաղթել միայն ռուսաստանցի Էդգար Մախոնցեւին:
Սկսել են հաղթանակով
![\"\"](\"https://www.aravot.am/2008/aravot_arm/November/15/p15.jpg\")
Դրեզդենում մեկնարկել են շախմատի տղամարդկանց 38-րդ եւ կանանց 23-րդ համաշխարհային օլիմպիադաները:
Գործող օլիմպիական չեմպիոն Հայաստանի տղամարդկանց հավաքականը, որն այդ տիտղոսը նվաճել է 2006 թվականին Թուրինում, մեկնարկային հանդիպումում թիմային 4:0 «չոր» հաշվով պարտության է մատնել Իտալիայի ընտրանուն: Մեր թիմի կազմում հաղթանակն ապահովել են գրոսմայստերներ Լեւոն Արոնյանը, Վլադիմիր Հակոբյանը, Գաբրիել Սարգսյանը եւ Տիգրան Լ. Պետրոսյանը: Մրցակցին, որը վիճակահանությամբ նույնպես Իտալիայի հավաքականն էր, ընդամենը կես միավոր վաստակելու հնարավորություն են տվել նաեւ մեր աղջիկները: Այդ «լավությունն» արել է Էլինա Դանիելյանը, որը միավորը բաժանել է միջազգային վարպետ Ելենա Սեդինայի հետ: Լիլիթ Մկրտչյանը, Նելլի Աղինյանը եւ Լիլիթ Գալոյանը մրցակիցներին հարկադրել են կանգնեցնել ժամացույցը:
Երեկ կայացած երկրորդ տուրում մեր տղաներն ուժերը չափում էին Մոլդովայի, իսկ աղջիկները՝ Չեխիայի հետ:
