![\"\"](\"https://www.aravot.am/2008/aravot_arm/November/15/p1.jpg\")
Երեկ ԱԺ ճեպազրույցի ընթացքում «Առավոտի» հարցին, թե ինչպե՞ս է ՀՅԴ-ն վերաբերվում «Ժառանգության» առաջարկին՝ ազատագրված տարածքների հարցը լուծել փոխանակությամբ եւ, ասենք, Աղդամը փոխանակել Շահումյանի հետ՝ ՀՅԴ խմբակցության ղեկավար Վահան Հովհաննիսյանը պատասխանեց. «Նման հարց չենք քննարկել, որովհետեւ չեմ կարծում, թե դիմացի կողմը նման ծրագրին համաձայն լինի: Քննարկելու բան է: Բայց ընդհանրապես՝ մեր սկզբունքն է, որ դեռ տարիներ առաջ արտահայտել է ՀՅԴ բյուրոյի ներկայացուցիչը՝ մենք հայկական տարածքները հայկական տարածքներով չենք փոխանակում»: Հետաքրքրվեցինք՝ ըստ այդմ, Աղդամը համարում են հայկակա՞ն տարածք, եւ Վահան Հովհաննիսյանն ասաց. «Ես գիտեմ, որ կան պաշտոնյաներ, որոնք չեն հավատում, որ Աղդամը հայկական տարածք է: Բայց ես դրանում վստահ եմ՝ դա պատմական հայկական տարածք է»: Հիշեցնենք, որ ՀՀ նախագահ Սերժ Սարգսյանն էր դեռ պաշտպանության նախարար եղած ժամանակ՝ 2001-ի մայիսին հայտարարել. «Հարցին չի կարելի միակողմանի մոտենալ եւ ամեն քայլափոխի ասել, որ մենք ազատագրել ենք, ազատագրել ենք, ազատագրել ենք… Աղդամը մերն է, չգիտեմ, Միրբաշիրը մերն է… Լուրջ չեմ համարում սա»:
